Batys Qazaqstanda 670-ten astam adam ınfektsııalyq statsıonarda jatyr
ORAL. QazAqparat – Batys Qazaqstan oblysynda 1115 tósektik 11 ınfektsııalyq statsıonarda 674 adam em qabyldaýda, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 29 naýqas jansaqtaý bólimshesinde jatyr.
Arman Talǵatulynyń sózine qaraǵanda, jansaqtaý bóliminde jatqandardyń ishinde ekeýi 50-ge tolmasa, tórteýi – 50-60, 17-si – 60-80 jas aralyǵyndaǵylar, beseýi – seksennen asqandar. 23 naýqastyń 16-sy júrek-qan tamyrlary aýrýlaryna, jeteýi qant dıabetine shaldyqqan.
Osy kezge deıin oblysta barlyǵy 18104 adam indet juqtyrsa, sonyń 14327-si nemese 79 paıyzy jazylyp shyqty. 269 adam kóz jumdy.
Bıyl jyl basynan beri koronavırýstan qaıtqandar sany 100-ge jetti. Sonyń ishinde 28-i qańtarda, 15-i aqpanda, 30-y naýryzda, 27-si sáýirde ómirden ótti. Olardyń 56-sy áıelder
bolsa, 44-i – er adamdar.
Qaıtqandardyń 98-iniń sozylmaly derti (75 paıyzy – júrek-qan tamyrlary aýrýlary, 13 paıyzy – qant dıabeti, basqasy – 12 paıyz) bolǵan.
«Qazirgi tańda indet órship tur. Naýqastar ınfektsııalyq statsıonarǵa aýyr jáne asa aýyr halde túsip jatyr.
Sondyqtan COVID-19-dyń taralýyna jol bermeý úshin turǵyndar shekteý sharalary men sanıtarlyq talaptardy qatań saqtaǵany jón», dedi A.Qalıbekov.
Eske sala keteıik, budan buryn Oralda sońǵy tórt kúnde 600-ge jýyq adamnan koronavırýs anyqtalǵanyn jazǵan bolatynbyz.
