Batys Qazaqstanda 65 myńǵa jýyq adam koronavırýsqa qarsy ekpe aldy
ORAL. QazAqparat – Batys Qazaqstan oblysynda 64632 adam koronavırýsqa qarsy vaktsınanyń birinshi komponentimen egildi, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, sondaı-aq 26045 adam ekinshi komponentimen de egilip úlgerdi.
Arman Talǵatulynyń sózine qaraǵanda, óńirge osy kezge deıin 138560 doza (89050-i – birinshi, 49510-y – ekinshi komponent) vaktsına kelip tústi.
25 sáýir kúni oblysqa 2 myń doza (1 myńy – birinshi, 1 myńy – ekinshi komponent) qazaqstandyq vaktsına jetkizilip, sonyń nátıjesinde 1 myń turǵyn otandyq ekpeni qabyldady.
Sonymen qatar reseılik jáne otandyq ekpeden basqa Birikken Arab Ámirlikterinde óndirilgen 45 myń (27500-i – І, 17500-i – ІІ komponent) doza Hayat-Vax arab vaktsınasy ákelindi.
Oblysta osy ýaqytqa deıin barlyǵy 21612 adam indet juqtyrsa, sonyń 77 paıyzy (16674) jazylyp shyqty. 320 adam kóz jumdy.
Bıylǵy jyl basynan beri 152, sonyń ishinde qańtarda – 28, aqpanda – 15, naýryzda – 30, sáýirde – 42, mamyrda 37 naýqas koronavırýstan ońala almady. Kóz jumǵandardyń 80-i – áıel, 72-si – er adamdar. Olardyń 93,2 paıyzynda (138) sozylmaly dertteri bolǵan.
«Kúni búgin 195 tósektik 4 karantındik statsıonarda 5 adam, al 1123 tósektik 18 ınfektsııalyq aýrýhanada 486 naýqas emdelýde. Sonyń ishinde 27 naýqas jansaqtaý bólimshesinde, bulardyń 25-i sozylmaly dertke shaldyqqan. Naýqastar ınfektsııalyq statsıonarlarǵa aýyr jáne asa aýyr halde túsip jatyr. Sondyqtan karantındik talaptardy saqtaý kerektigin turǵyndardyń esine salamyz», - dedi A.Qalıbekov.
Eske sala keteıik, budan buryn BQO statsıonarlarynda koronavırýspen 500-ge jýyq naýqas jatqandyǵyn, sońǵy tórt kúnde 400-ge jýyq adamnan indet tabylǵanyn jazǵan bolatynbyz.
