Batys Qazaqstanda 640-tan astam naýqas ambýlatorııalyq em alyp jatyr
BQO densaýlyq saqtaý basqarmasy basshysynyń orynbasary Gúlnár Ábdirahmanova óńirlik kommýnıkatsııalar qyzmeti alańynda ótken brıfıngide málim etkendeı, sonyń 71 paıyzynda aýrý jeńil ótip jatyr, 6 paıyzynda ortasha aýyr, 23 paıyzy – sımptomy joqtar.
Onyń aıtýynsha, sonymen qatar oblysta 911 tósektik 16 ınfektsııalyq statsıonarda 221 naýqas emdelýde. Statsıonarlar 24,3 paıyzǵa tolǵan.
Sonyń ishinde 88 tósektik jansaqtaý bólimshesinde 21 adam (tolymdylyǵy – 23,9 paıyz) em qabyldap jatyr. Bulardyń 20-sy aýyr, bireýi asa aýyr halde.
Invazıvti jasandy tynys alý apparatyna 1, ınvazıvti emes osyndaı qurylǵyǵa 8 naýqas qosylǵan.
Naýqastardyń 13-i júrek-qan tamyrlary aýrýlaryna, beseýi qant dıabetine shaldyqqan.
Pandemııa bastalǵannan beri 38 834 naýqastyń 83,3 paıyzy (32 357) jazylyp shyqty. Barlyǵy 812, bıyl 643 adam indetten kóz jumdy.
Oblystyq jedel járdem stantsııasyna sońǵy aptada 6 157 qońyraý shalynsa, sonyń 782-si (12,7 paıyz) kovıdke baılanysty boldy. 110-y statsıonarǵa jatqyzyldy.
«Búginde qala jáne aýdan emhanalarynda «Spýtnık V», «QazVac», «Vero Cell» vaktsınalary jetkilikti kólemde bar. Osy kezge deıin oblys boıynsha 235 760 adam birinshi, 214 499 adam ekinshi komponentpen egildi. Turǵyndardy vaktsınatsııalaý jumysy jalǵasýda», - dedi G.Ábdirahmanova.
Eske sala keteıik, budan buryn BQO-da 235 myńnan astam adamnyń koronavırýsqa qarsy ekpe alǵanyn jazǵan bolatynbyz.
