Batys Qazaqstanda 64 myńnan astam adam tumaýǵa qarsy ekpe saldyrdy
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkendeı, qazirgi tańda turǵyndardyń 9,78 paıyzy ekpemen qamtyldy.
Sonyń ishinde 14 349-y – 14 jasqa deıingi balalar, 49 848-i – eresek adamdar.
Bıyl JRVI men tumaýǵa qarsy egý úshin 67 myń doza reseılik «Grıppol Plıýs» vaktsınasy satyp alynǵan bolatyn. Kúzgi maýsymdyq aýrýlar kezinde koronavırýs ınfektsııasynyń órshýine jol bermeý úshin ekpe jumystary ádettegiden erterek, 15 qyrkúıekte bastalyp, odan ári jalǵasýda.
Jalpy, oblysta juqpaly aýrýlar boıynsha epıdemıologııalyq jaǵdaı turaqty. Óńirde sanıtarlyq qyzmetter arqyly 97 juqpaly dert boıynsha monıtorıng júrgiziledi. Bıylǵy segiz aıdyń qorytyndysy boıynsha 26 ınfektsııa boıynsha aýrýshańdyq tómendegen. Mysaly, salmonellez 2,4, bakterııalyq dızenterııa 6 ese azaıdy. Al oba, tyrysqaq, ish súzegi, qutyrý, týlıaremııa, dıfterııa, sirespe, qyzamyq sekildi juqpaly aýrýlar tirkelgen joq.
Barlyq aldyn alý jumystary jáne koronavırýsqa qatysty karantındik sharalar basqa juqpaly aýrýlardyń azaıýyna septigin tıgizdi.
Bıyl sondaı-aq óńirde bir jasqa deıingi 9 751 sábı BTsJ-dan ekpe aldy, bul jańa týǵan nárestelerdiń 97,1 paıyzyn quraıdy. Sol sekildi 6 jasar balalardyń 98 paıyzy qaıta vaktsınatsııalandy.
Eske sala keteıik, budan buryn BQO shekaralaryndaǵy avtoótkelderde sanıtarlyq talaptar kúsheıtilgenin jazǵan bolatynbyz.