Batys Qazaqstanda 600 tonnadaı shóp janyp ketti

ORAL. QazAqparat - Batys Qazaqstan oblysynda 600 tonnadaı shóp janyp ketti, dep habarlaıdy QazAqparat tilshisi.

BQO TJ departamentiniń baspasóz qyzmetinen túsken málimetke qaraǵanda, oqıǵa 18 shilde kúni Terekti aýdany Bogdanov aýyldyq okrýginde boldy.

«Tańǵy saǵat 04.00-de «Rodına» JShS aýmaǵynda 2405 orama (rýlon) shóptiń otqa oranǵany jóninde habar tústi. Órtti sóndirýge departamentten 4 qyzmetker (1 tehnıka) jumyldyryldy. Sondaı-aq erikti órt sóndirý qurylymynan 10 adam, 3 traktor, 1 sý quıǵysh tehnıka tartyldy. Tilsiz jaý bólek úıilgen 6 iskirtti (600 tonnadaı) jalmady. Órt 07.22-de oqshaýlandy.

Aldyn ala boljam boıynsha órt qasaqana ot qoıýdan shyqqan. BQO TJ departamenti turǵyndarǵa órt qaýipsizdigi erejelerin qatań saqtaý kerektigin eske salady», dep habarlady vedomstvodan.