Batys Qazaqstanda 600 myń gektar alqapqa aýyl sharýashylyǵy daqyldary egilmek
BQO aýyl sharýashylyǵy basqarmasynyń basshysy Naýryzbaı Qaraǵoıshınniń aıtýynsha, sonyń ishinde dándi daqyldar 238,4 myń gektar bolady, munyń 86,1 myńy – kúzdik, 152,3 myńy – jazdyq daqyldar. Sondaı-aq, maıly daqyldar 163,5 myń gektarǵa egiletin bolsa, onyń 55 myńy – kúnbaǵys, 108,5 myńy – maqsary.
Kartop, kókónis-baqsha daqyldaryn 9 600 gektarǵa egý josparlanyp otyr. Atap aıtqanda, 4 200 gektary – kartop, 3 900 gektary – kókónis jáne 1 500 gektary – baqsha daqyldary.
Basqarma basshysynyń sózine qaraǵanda, jyldaǵydaı mal azyqtyq daqyldarǵa da mán berilmek. 188,5 myń gektar mal azyqtyq daqyldar alqabynyń (2022 jyly – 188,4 myń ga) 20,4 myńy – birjyldyq shópter, 1,5 myńy – súrlemdik daqyldar, 12,6 myńy – kópjyldyq shópter. Oǵan qosa, ótken jyldardan qalǵan 154 myń gektar kópjyldyq shóp qaıta kókteıdi.
Qazirgi tańda oblys aýdandarynda ylǵal jabý jumystary bastalyp ketti. 53,3 myń gektar jerdiń ylǵaly jabyldy, bul – jospardyń 16,2 paıyzy.
Naýryzbaı Qadyrbaıulynyń málim etkenindeı, bıylǵy egiske qajetti 25,7 myń tonna tuqym tolyqtaı daıyndaldy. «Oral-Jer» JShS jáne «Kazagreks» AQ zerthanalary tuqym tekserýdi jaqyn kúnderi aıaqtaıdy.
Kóktemgi-dalalyq jumystarǵa 5 315 traktor, 2 591 dánsepkish, 789 qopsytqysh jáne basqa aýyl sharýashylyǵy tehnıkalary tartylmaq. Bul maqsatqa bólingen 9,8 myń tonna dızel otynynyń 5,1 myń tonnasyna kelisimshart jasalyp, 671 tonnasy alyndy. Qalǵany osy jáne aldaǵy aılarda jetkiziledi.
«Memleket basshysynyń tapsyrmasyna sáıkes azyq-túlik qaýipsizdigin qamtamasyz etýdiń mańyzy zor. Osy oraıda, memleket tarapynan udaıy qoldaý kórsetiledi. Bıyl ósimdik sharýashylyǵy baǵytyndaǵy sýbsıdııalaý baǵdarlamalary men qyzmetter kórsetýge barlyǵy 1,2 mlrd teńge qarastyryldy. Mysaly, sýbsıdııalaý baǵdarlamalaryna 846,6 mln, sonyń ishinde tuqym sharýashylyǵyn damytýǵa – 270,2 mln teńge (1 520 t), tyńaıtqyshtar qunyna – 350,6 mln teńge (3 900 t), pestıtsıdter qunyna – 188,7 mln teńge (39 myń lıtr), aýyl sharýashylyǵy taýarlaryn óndirýshilerge sý berý qyzmetterin qunyn jeńildetýge 37,1 mln teńge bólindi. Sonymen qatar, «Agrarlyq nesıe korporatsııasy» AQ arqyly kóktemgi dala jumystaryna 2,5 mlrd teńge berildi, sonyń ishinde «Keńdala» baǵdarlamasy boıynsha 2 mlrd teńge (mólsherleme 5 paıyz) jáne «Agrobıznes» baǵdarlamasyna 500 mln teńge (mólsherleme 22 paıyz, sýbsıdııa esebinen túpkilikti qaryzý alýshyǵa 6 paıyz) qaraldy. Búginde barlyǵy 1,25 mlrd teńge («Keńdala» – 1,2 mlrd teńge jáne «Agrobıznes» – 57,9 mln teńge) nesıe berilgen, bul – qaralǵan qarajattyń 50 paıyzy. Nesıeleý jalǵasyp jatyr», - dedi QazAqparat tilshisine N. Qaraǵoıshın.
Eske sala keteıik, budan buryn Naýryzbaı Qaraǵoıshınniń BQO aýyl sharýashylyǵy basqarmasynyń basshysy bolyp taǵaıyndalǵanyn jazǵan edik.