Batys Qazaqstanda 600-den astam turǵyn alaıaqtarǵa aldanyp qalǵan
BQO polıtsııa departamentiniń baspasóz qyzmeti málim etkenindeı, sonyń 350-den astamy ınternet arqyly jasalǵan alaıaqtyq deregine jatady.
Pandemııaǵa baılanysty onlaın saýdanyń qyzǵan kezinde qarjy jymqyrý qylmysy ótken jylmen salystyrǵanda, eki esege ósken.
Aılakerdiń quryǵyna túsken jábirlenýshiler taýardyń bar-joǵyn anyqtamastan, qarjysyn aýdara salady.
Munyń taǵy bir ereksheligi, alaıaqtar el aýmaǵynda ǵana emes, odan tysqary jerde otyryp, «qarmaq salady». Mysaly, ózin 1986 jylǵy týǵan reseılik R. esimdi azamat dep tanystyrǵan alaıaqtan BQO-nyń birneshe turǵyny japa shekti. Ol kolesa.kz saıtynda «Lada Prıora» avtokóliginiń 623 myń teńgege qoljetimdi baǵaǵa satylatyny jóninde jarnama ornalastyrǵan. Buǵan senip qalǵan Oral qalasynyń turǵyny Qazaqstanda tirkelmegen abonenttik nómirge WhatsApp messendjeri arqyly habarlama joldaǵan. Sodan keıin alaıaq RF aýmaǵynan avtokólikti tikeleı jetkizip ári qaıta tirkep beremin dep atalǵan qarajatty ıemdenip ketken.
«Qazirgi kezde QR QK 190-babyna sáıkes qylmystyq is qozǵalyp, izdestirý jumystary júrgizilýde. Kúdikti ázirge ustalǵan joq, ol Qazaqstannan tysqary jerde júrýi múmkin. BQO polıtsııa departamenti alaıaqtarǵa aldanyp qalmaý úshin turǵyndardyń saq bolýy kerektigin eske salady», dep habarlady vedomstvodan.
Eske sala keteıik, budan buryn BQO-da alaıaq áıeldiń úı alyp beremin dep 23 adamdy aldap ketkenin jazǵan bolatynbyz.
https://kaz.inform.kz/news/bko-da-alayak-ayel-uy-alyp-beremin-dep-23-adamdy-aldap-ketken_a3797080