Batys Qazaqstanda 60-tan astam dala órti tirkeldi
ORAL. QazAqparat – Batys Qazaqstan oblysynda bıyl orman jáne dala órtteri kóbeıip ketti, dep habarlaıdy QazAqparat tilshisi.
BQO TJ departamenti bastyǵynyń orynbasary, azamattyq qorǵaý maıory Nurlan Taýbekovtiń málim etkenindeı, óńirde 5 qyrkúıekke deıin 1200 gektardan astam jerdi sharpyǵan 14 orman órti tirkeldi.
Sondaı-aq 56 myńnan astam gektar jerde 61 dala órti jáne 7954 gektarda 313 janý oqıǵasy boldy.
Ótken jyldyń osy kezeńinde 3 orman órti, 7601 gektarǵa jaıylǵan 227 janý oqıǵasy bolǵan edi.
Bıyl dala órtinen, ásirese, Aqjaıyq (11 janý, 399 ga), Báıterek (38 janý, 758 ga), Bórli (31 janý, 788 ga), Qaratóbe (16 janý, 663 ga), Syrym (15 janý, 1156 ga), Tasqala (23 janý, 979 ga), Terekti (10 janý, 140 ga), Shyńǵyrlaý (19 janý, 360 ga) aýdandary jáne Oral qalasy (12 janý, 100 ga) kóbirek zardap shekti.
«Órt qaýpi áli de seıile qoıǵan joq. Óıtkeni oblystyń barlyq aýmaǵynda qyrkúıek aıynyń ekinshi onkúndiginde órt qaýpi saqtalady. Kún 30 gradýsqa deıin ysıdy, tek aıdyń aıaǵyna qaraı jańbyr jaýady dep boljanýda. Sondyqtan turǵyndar otpen abaı bolyp, órt qaýipsizdigi erejelerin qatań saqtaǵany jón», dedi N.Taýbekov.
Eske sala keteıik, budan buryn Batys Qazaqstanda iri dúken órtenip ketkenin jazǵan bolatynbyz.
