Batys Qazaqstanda 5824 adam koronavırýs indetinen jazylyp shyqty
ORAL. QazAqparat – Batys Qazaqstan oblysynda 5824 adam koronavırýs indetinen jazylyp shyqty, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, óńirde kúni búginge deıin 6690 naýqas tirkeldi.
Sonyń 3283-inde aýrý belgileri anyq baıqalsa, 3407-siniń eshqandaı sımptomdary joq.
Oblysta 5824 adam emdelip shyqsa, ókinishke qaraı, 86 naýqas kóz jumdy.
1-23 tamyz aralyǵynda 444 adamnyń koronavırýs juqtyrǵany tirkelse, sonyń ishinde 287-si (64,6 paıyz) JRVJ belgilerimen dárigerge júgingen. 78 naýqas (17,5 paıyz) – buryn aýyrǵandarmen qarym-qatynasta bolǵandar. 57 emdelýshiden (12,8 paıyz) profılaktıkalyq maqsatta, 22-sinen (4,9 paıyz) epıdemıologııalyq qadaǵalaý boıynsha synama alynǵan.
23 tamyz kúni oblysta 13 adamnyń aýyrǵany anyqtalsa, olardyń bári de – Oral qalasynyń turǵyndary. Bul kúni oblys aýdandarynda dert tirkelgen joq.
Syrqattanýshylar da kemip, ósim keshe 0,1 paıyzdy kórsetti.
Eske sala keteıik, budan buryn Batys Qazaqstanda koronavırýsqa shaldyǵý kórsetkishi tómendegenin, BQO ákiminiń grantyn ıelengen jastardyń deni bolashaq dárigerler ekendigin jazǵan bolatynbyz.
