Batys Qazaqstanda 55 myńnan astam adam revaktsınatsııadan ótti

ORAL. QazAqparat – Batys Qazaqstan oblysynda 55 553 adam revaktsınatsııadan ótti, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, vaktsınatsııa naýqany bastalǵannan beri barlyǵy 270 019 adam koronavırýsqa qarsy vakınanyń birinshi komponentimen egildi.

Bul – egilýge jatatyn turǵyndardyń 65,2 paıyzy.

Sondaı-aq 255 343 adam (61,6 paıyzy) ekinshi komponentti saldyrdy. Pfizer vaktsınasyn 9 761 adam qabyldasa, sonyń 5 084-i – jasóspirimder, 351-i – júkti, 4 326-sy – sábı emizetin áıelder.

Basqarmadan túsken málimetke qaraǵanda, pandemııa bastalǵannan beri oblys boıynsha 49 398 adam koronavırýs juqtyrdy.

Sońǵy kezde «sary» aımaqta turǵan óńirde aýrý juqtyrý kórsetkishi tómendep keledi. Ótken táýlikte 31 adamnan indet tabyldy.

Batys Qazaqstanda COVID-19 dıagnostıkasy boıynsha 14 zerthana jumys jasaıdy. Sońǵy táýlikte 1 029 zertteý júrgizildi.

Kúni búgin 751 tósektik 14 ınfektsııalyq statsıonarda 194 naýqas emdelýde. Sonyń 21-i jansaqtaý bólimshesinde jatyr. Olardyń 17-si aýyr, tórteýi asa aýyr halde.

Jyl basynan beri 31 naýqas koronavırýstan ómirden ozdy.

Eske sala keteıik, budan buryn BQO-da egilýge jatatyn turǵyndardyń 65 paıyzdan asamy vaktsına saldyrǵanyn jazǵan bolatynbyz.