Batys Qazaqstanda 52 mektep dırektorynyń orny bos tur
BQO bilim salasynda sapany qamtamasyz etý departamentiniń basshysy Bulbul Kúzembaevanyń óńirlik kommýnıkatsııalar qyzmeti alańynda ótken brıfıngide málim etkenindeı, sol bilim ordalarynda dırektordyń mindetin atqarý orynbasarǵa júktelgen.
Mundaı bos oryndar, ásirese, Aqjaıyq, Jańaqala, Terekti, Kaztalov, Qaratóbe, Bókeı ordasy aýdandarynda kóbirek.
Onyń sózine qaraǵanda, shilde-tamyz aılarynda QR Oqý-aǵartý mınıstrliginiń tapsyrmasyna sáıkes mektepterdiń materıaldyq-tehnıkalyq bazasynyń jaǵdaıy, aǵymdaǵy jáne kúrdeli jóndeý jumystarynyń júrgizilýi, sport zal, ashana, kitaphana, oqý zaly, modıfıkatsııaly kabınettermen qamtylýy, balalardyń qaýipsizdigin qamtamasyz etý sharalary, beınekameralarmen qamtylýy, qamqorshylyq keńesteriniń jumysy, oqýlyqtarmen qamtylýy, «Oqýǵa qushtar mektep» jobasy jáne debat klýbtarynyń jumysyna, pedagogtardy jumysqa qabyldaý máselelerine monıtorıng júrgizildi. Aıtalyq, pedagogtardy qabyldaýdyń QR Bilim jáne ǵylym mınıstrliginiń 2012 jylǵy 21 aqpandaǵy №57 «Memlekettik bilim berý uıymdarynyń birinshi basshylary men pedagogterin laýazymǵa taǵaıyndaý, laýazymnan bosatý qaǵıdalaryn bekitý týraly» buıryǵyna sáıkestigi zerdelendi. Bıyl jyl basynan beri oblys boıynsha 74 mektepte 168 pedagogtyń ýaqytsha jáne turaqty bos orny bolsa, soǵan 167 adam qabyldanǵan. Sonyń 96-sy konkýrstyq negizde ( sonyń ishinde 84 pedagog atalǵan buıryqtyń talaptaryn buza otyryp qabyldanǵan), 71-i konkýrssyz jumysqa alynǵan.
Bulbul Kúzembaevanyń aıtýynsha, birinshi basshylardy taǵaıyndaý, rotatsııalaý, pedagogterdi attestattaý oblystyq bilim basqarmasy arqyly júrgiziledi. 2022 jyldyń qańtarynan bastap 23 mektepke birinshi basshy taǵaıyndalǵan. Alaıda QR Bilim jáne ǵylym mınıstrligi 2012 jylǵy 21 aqpandaǵy №57 buıryǵynyń talaptary tolyq saqtalmaıtyndyǵy belgili boldy. Konkýrsty uıymdastyrý protsedýralary, habarlandyrý berýden bastap, úmitkerlerdiń biliktiliginiń sáıkestigi, konkýrs hattamalarynyń rásimdelýi, baǵalaý paraqtarynyń toltyrylýy, qoıylǵan baldardyń eseptelýinde kemshilikter jiberilgen.
Sonymen qatar bıyldan bastap QR Bilim jáne ǵylym mınıstrliginiń 2021 jylǵy 11 qarashadaǵy №559 buıryǵymen bekitilgen «Memlekettik bilim berý mekemeleriniń birinshi basshylaryn rotatsııalaýdy ótkizý erejesine» sáıkes osy kezge deıin 70 bilim berý mekemesiniń (balabaqsha, mektep, tehnıkalyq jáne kásiptik bilim berý mekemeleri) basshylary rotatsııalanǵan. Rotatsııalaýdy uıymdastyrý kezinde habarlama berý rásiminiń buzylýy, biliktilik sanaty týraly aqparattyń bolmaýy sekildi kemshilikter anyqtaldy.
Departament basshysy málim etkenindeı, bilim berý mekemeleriniń basshylary tarapynan mınıstrliktiń 2020 jylǵy 11 mamyrdaǵy №190 buıyryǵymen bekitilgen ádep normalaryn saqtamaýy jıi oryn alady. Mysaly, departament janyndaǵy konsýltatıvtik-keńesshi organda eki balabaqsha tárbıeshilerinen (Kaztalov, Aqjaıyq aýdanyna qarasty) balabaqsha meńgerýshilerine qatysty shaǵym qaraldy. Kaztalov aýdanyna qarasty balabaqsha meńgerýshisine «Ákimshilik quqyqbuzýshylyq týraly» QR Kodeksiniń 409 babynyń 7-3 tarmaǵyna sáıkes tárbıeshilerdi óziniń kásiptik mindetine jatpaıtyn jumystarǵa tartý, taýarlar satyp alýǵa mindettegeni úshin ákimshilik is qozǵalyp, ákimshilik eskertý berildi. Aqjaıyq aýdanynyń balabaqsha meńgerýshisine ádep normalaryn saqtamaǵany úshin sógis túrindegi tártiptik shara qoldanyldy.
«Mektepterdiń materıaldyq- tehnıkalyq bazasyna keletin bolsaq, 97 mektepte (bastaýysh jáne shaǵyn jınaqty mektepter) sport zaly joq. Sport quraldarynyń jetispeýshiligi kóptegen mektepterde baıqalady. 118 (30 paıyzy) mektepte ınternet jyldamdyǵy tómen, kompıýterlerdiń 29,3 paıyzy eskirgen, ınteraktıvti taqtalardyń 12,1 paıyzy jumys jasamaıdy. Mektepterdiń 70 paıyzy jańa modıfıkatsııaly kabınettermen, 50 paıyzy ǵana laboratorııalarmen qamtylǵan. Bar kabınetterdiń ózi 64 paıyzǵa eskirgen. Balalardyń qaýipsizdigin qamtamasyz etý maqsatynda barlyq mektepterde ishki, syrtqy beınebaqylaýlar ornatylǵan, biraq Іshki ister jáne Bilim mınıstrliginiń birlesken buıryǵy talaptaryna sáıkes kelmeıdi jáne qosymsha kameralar ornatýdy qajet etedi. Oblysta apattyq jaǵdaıdaǵy 6, úsh aýysymda oqytatyn 10 mektep bar. Bıyl bıýdjet esebinen 3 apatty, 2 oqýshy tapshylyǵynyń, 1 úsh aýysymdy mekteptiń máselelerin sheshý úshin 6 nysan qurylysyn aıaqtaý josparlanǵan. Al, kúrdeli jóndeýmen qamtylǵan 15 mekteptiń úsheýi ǵana jańa oqý jylyna daıyn boldy. Qalǵan 12 mektepte kúrdeli jóndeý jumystary jalǵasýda», dedi B.Kúzembaeva.
Eske sala keteıik, budan buryn BQO-da 100-ge jýyq mekteptiń jańarǵan pándik kabınettermen jabdyqtalyp jatyrǵanyn jazǵan bolatynbyz.