Batys Qazaqstanda 505 ýchaskelik saılaý komıssııasy jumys isteıtin bolady
Oblystyq saılaý komıssııasynyń tóraǵasy Ǵaısa Qapaqovtyń málim etkenindeı, sonyń 110-y Oral qalasynda ornalasqan.
Barlyq saılaý ýchaskeleri 10 jeltoqsannan bastap jumysqa kirisedi. Al 14 aýmaqtyq (oblystyq, qalalyq, aýdandyq) saılaý komıssııasy eki aıdan beri óz qyzmetterin atqarýda.
Ǵaısa Hamıdollaulynyń sózine qaraǵanda, aldyn ala esep boıynsha oblysta 458 myń saılaýshy bar. Saılaýshylar tizimi áli de naqtylanatyn bolady.
Saılaý komıssııalaryna jańadan 500 adam tartyldy, olardyń báriniń de saılaý ótkizýde jumys tájirıbeleri bar. Múshe bolǵan 3259 adamnyń 98-i aýmaqtyq, 3161-i ýchaskelik saılaý komıssııalarynyń quramyna engen.
10 jeltoqsannan bastap úgit-nasıhat jumystary bastalady. Máslıhat depýtattaryn saılaý alǵash ret partııalyq tizim boıynsha ótedi. Qazirgi tańda «Nur Otan» – 350, «Aýyl» – 41, «Aq jol» – 35, «Adal» partııasy 29 úmitker usynyp otyr.
Kóp uzamaı partııalar ókilderi saılaýshylarmen kezdesýlerin ótkizedi. Al qańtar aıynyń basynda oblystyq telearnada jarııa pikirsaıys uıymdastyrylady.
«Basty maqsat – aldaǵy saılaýdy barlyq sanıtarlyq talaptarǵa saı ótkizý. Bul saılaýdyń ereksheligi de sol, birinshi ret indet jaǵdaıynda ótkeli tur. Sondyqtan saılaý komıssııalarynda barlyq saqtyq sharalary qolǵa alynyp, ár azamattyń óziniń konstıtýtsııalyq quqyǵyn paıdalanyp, daýys berýine tolyq múmkindik jasaýymyz qajet», dedi QazAqparat tilshisine Ǵ.Qapaqov.