Batys Qazaqstanda 500 qyzmetker jumysqa shyǵýdan bas tartty – ákimdik oqıǵaǵa túsinik berdi
BQO ákimdiginen túsken málimetke qaraǵanda, Bórli aýdany Pýgachev aýylynda ornalasqan «KKC-Sicim» JShS-da barlyǵy 3 myńdaı adam jumys isteıdi.
«KKC-Sicim» basshylyǵy bıylǵy aqpanda ujymdyq eńbek sharty boıynsha jalaqyny 20 paıyzǵa kóterýdi josparlaǵan. Osy másele boıynsha 16 qańtar kúni jınalys ótkizý kózdelgen. Muny kúni buryn kompanııanyń kadr qyzmeti barlyq qyzmetkerlerge habarlaǵan.
Aıta keteıik, sońǵy ret eńbekaqy ótken jyldyń aqpanynda 8,5 paıyzǵa kóterilgen.
Bórli aýdany ákimdiginen málim etkenindeı, 13 qańtar kúni áleýmettik áriptestik jáne áleýmettik-eńbek qatynastaryn retteý jónindegi aýdandyq úshjaqty komıssııanyń otyrysy ótkizilip, onda «KKC-Sicim» JShS qyzmetkerleriniń jalaqysyn kóterý máselesi talqylanǵan.
Sondaı-aq «KKC-Sicim» kompanııasy basshylyǵynyń sheshimimen eńbek qaýipsizdigi tehnıkasyn saqtaý maqsatynda kúnniń sýytýyna baılanysty 9-10 qańtar kúnderi jumysty toqtatý máselesi de ortaǵa salynǵan.
Eńbek shartyna sáıkes jumys toqtap turǵan kezde qyzmetkerlerge jalaqynyń 50 paıyzy tólenedi. Áıtse de basqa jaqtan kelip, qalashyq aýmaǵynda turatyndar jumys toqtap turǵan kezde jalaqyny 100 paıyz kólemde tóleýdi, oǵan qosa eńbekti baǵalaýda biliktilikke ózgeris engizip, jolaqyǵa qarjy bólýdi talap etken. 10 qańtar kúni kompanııa basshylyǵy jumys toqtap turǵan mezgilde 9 saǵat boıynsha tólem tóleý, jolaqyny 60 paıyzǵa deıin kóterý jóninde sheshim qabyldaǵan.
Aqpannan bastap attestatsııa ótkizý josparlanǵan, sonyń qorytyndysyna sáıkes ár qyzmetker biliktilik dárejesin kóterýge múmkindik alady.
«KKC-Sicim» basshylyǵynyń qatysýymen ótken úshjaqty komıssııa otyrysynda qyzmetkerlermen kezdesý 16 qańtar kúni jumystan keıin saǵat 20.00-de ótetini habarlanǵan. Onda jumys toqtap turǵan ýaqytta 9 saǵatqa eńbekaqy tólenetini, jolaqyny kóterý, attestatsııanyń bastalatyny, sondaı-aq ınflıatsııany eskere otyryp, ujymdyq eńbek shartyna sáıkes jalaqyny 20 paıyzǵa arttyrý jóninde habarlama jasaý kózdelgen edi.
«Úshjaqty komıssııada aıtylǵan máseleler jóninde qyzmetkerler habardar boldy. Alaıda 16 qańtar kúni tańmen qyzmetkerlerdiń bir bóligi jalaqyny 50 paıyzǵa kóterýdi talap etip, jumysqa shyqpady. Sonymen qatar biliktilikti aıqyndaý úshin synaq tapsyrýdan bas tartty», dep túsindirdi Bórli aýdanynyń ákimi Erkebulan Ihsanov.
Aýdan ákiminiń orynbasary Aslanbek Sarqulovtyń sózine qaraǵanda, qyzmetkerlerge mıtıngi ótkizý jóninde zańǵa sáıkes bes táýlik buryn jergilikti atqarýshy organdarǵa habar berýi kerektigi jóninde eskertildi.
«Ruqsat etilmegen mıtıngi, ereýilderdi uıymdastyrǵany úshin jaýapkershilik qarastyrylǵan. Tutastaı alǵanda, jaǵdaı turaqty», dedi A.Sarqulov.