Batys Qazaqstanda 500-ge jýyq oqýshydan koronavırýs anyqtaldy
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 74-i oqý protsesiniń bastalýyna baılanysty emes.
Onyń sózine qaraǵanda, 151 bala óz otbasynda indetti buryn aýyrǵan jaqyndarynan juqtyrǵan.
Bıyl jyl basynan beri 252 bala statsıonarlarda emdelgen. Qazirgi tańda 6 jasóspirim statsıonarlarda em qabyldap jatyr.
Sondaı-aq qyrkúıek aıynda 84 pedagogtyń aýyrǵany tirkeldi.
«Kúni búgin 27 mektepte 36 synyptyń oqýshylary men muǵalimderin jáne 8 balabaqshada 8 topty úı karantınine kóshirý týraly 32 qaýly shyǵaryldy. Mektepter men basqa da oqý oryndarynda ustazdar, shákirtter, stýdentter men qyzmetkerler arasynda kún saıyn monıtorıng júrgizilýde», dedi M.Aryspaev.
Departament basshysynyń aıtýynsha, qyrkúıek aıynda 2469 adamnan indet tabylsa, sonyń 1969-y – vaktsına almaǵandar.
Jyl basynan beri 28 251 naýqas tirkeldi.
Sońǵy aptada (24-30 qyrkúıek) aldyńǵymen salystyrǵanda, koronavırýs juqtyrý deńgeıi 23,5 paıyzǵa (526-dan 402-ge) tómendedi.
Oblys boıynsha barlyǵy 66 ekpe pýnkti jumys isteıdi. Kúni búginge deıin 221 246 adam (61,46 paıyz) vaktsınanyń birinshi, 197 111-i (54,75 paıyz) ekinshi komponentimen egildi.
M.Aryspaev óńir sary aımaqta bolǵanymen, jaǵdaıdyń áli de kúrdeli ekendigin jetkizdi. Vaktsınatsııalaý qarqyny tómen, osyǵan baılanysty turǵyndardy óz densaýlyǵyna enjar qaramaı, ekpe alýǵa shaqyrdy.
Eske sala keteıik, budan buryn Batys Qazaqstanda sońǵy tórt kúnde 200-ge jýyq adamnan koronavırýs tabylǵanyn jazǵan bolatynbyz.