Batys Qazaqstanda 4800-den astam túlek UBT tapsyrady
BQO bilim basqarmasy málim etkenindeı, sonyń 4838-i nemese 85,1 paıyzy UBT tapsyrýǵa nıet bildirdi.
«Sonyń ishinde 316 mektep bitirýshi «Altyn belgiden», 304-i úzdik attestattan úmitker. Oblys mektepterinde barlyǵy 115 myńǵa jýyq oqýshy bilim alýda. Bıyl sondaı-aq 9 synyptan 9250 oqýshy emtıhan tapsyrady», dep habarlady vedomstvodan.
Mektep túlekteri UBT synaqtarynan Oral jáne Aqsaı qalalarynda ótedi.
BQO bilim salasyndaǵy sapany qamtamasyz etý departamentiniń basshysy Gúlnár Sársenǵalıevanyń tolyqtyrýynsha, mektep bitirý is-sharalary mindetti túrde sol bilim ordasynda ótkiziledi.
Onyń sózine qaraǵanda, «Mektepke kitap syıla», «Mektepke syı» aǵash otyrǵyzý, áleýmettik az qamtylǵan otbasylar men balalarǵa arnalǵan «Meıirimdi júrekten balalarǵa», «Týǵan jerge taǵzym», «Alǵashqy ustazyma alǵys aıtamyn!» syndy is-sharalar qoldaý tabady.
«Pedagogıkalyq ádepti saqtaý jáne aldyn alý maqsatynda mektep bitirý kezinde anımatorlardy, merekelik agenttikterdi, saltanattardy ótkizý úshin jeke stýdııalardy tartýǵa, merekelik ústelder uıymdastyrýǵa bolmaıdy. Sondaı-aq jalǵa beriletin avtomobılderdi tarta otyryp, qala nemese aýdan boıynsha kóshpeli ekskýrsııalar ótkizýge, ákimshilik pen pedagogterge syılyqtarǵa aqshalaı qarajat jınaýǵa, meıramhanalarda, kafelerde jáne basqa da oıyn-saýyq mekemelerinde mektep bitirý sharalaryn uıymdastyrýǵa tyıym salynady», dedi G.Sársenǵalıeva.
Eske sala keteıik, budan buryn BQO-da aýyl mektebin jańbyrdan keıin sý basqanyn jazǵan bolatynbyz.