Batys Qazaqstanda 464 mlrd teńgege segiz jańa joba iske qosyldy

ORAL. QazAqparat – Batys Qazaqstan oblysynda bıyl 464 mlrd teńgege segiz jańa joba iske qosyldy, dep habarlaıdy QazAqparat tilshisi.

BQO kásipkerlik jáne ındýstrıaldyq-ınnovatsııalyq damý basqarmasynyń basshysy Jumageldi Batyrnııazovtyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń nátıjesinde 1515 jumys orny ashyldy.

Onyń sózine qaraǵanda, «QPO b.v.» kompanııasy Qarashyǵanaq óńdeý kesheniniń gaz boıynsha óndiristik shekteýlerdi alyp tastaý jobasyn (jalpy quny – 445,6 mlrd teńge, jumys orny – 1100) júzege asyrdy.

Sondaı-aq jýyrda «World Green Company» JShS Báıterek aýdanynda qyzanaq pen qııar ósiretin jylyjaı keshenin (quny – 14 mlrd teńge, jumys orny – 160) paıdalanýǵa berdi.

Oral qalasynda «Kvant» JShS jalpy quny 2 mlrd teńgege baǵalanǵan (100 jumys orny) jıhaz fabrıkasyn iske qosty.

Oǵan qosa «UralskTradeCompany» JShS-ynyń sút zaýytyn (1 mlrd teńge, 50 jumys orny), basqa da jobalardy aıtýǵa bolady.

Jalpy, bıyl 685 mlrd teńgeniń 15 jobasyn júzege asyrý josparlanǵan.

«Jyl basynan beri Batys Qazaqstan oblysyna ınvestıtsııalar tartý, ınvestıtsııalyyq ahýaldy jaqsartý jáne eksportty ilgeriletý jónindegi óńirlik keńestiń tórt otyrysy ótkizilip, 534,8 mlrd teńgege baǵalanǵan 17 joba qoldaý tapty. Bul jobalardy júzege asyrý kezinde 3390-nan astam turaqty jumys ornyn ashý kózdelýde. Sonymen qatar ótken jyldan bastap «Bızneske arnalǵan úkimet« qyzmet etýde. Joba aıasynda bıznesti ashý jáne qoldaý úshin memlekettik qyzmetterdiń 50-den astam túri kórsetiledi. Kúni búginge deıin 400-ge jýyq kásipkerlik nysanyna 70-ten astam keńes berilip, 500-den astam qyzmet kórsetildi», dedi J.Batyrnııazov.

Eske sala keteıik, budan buryn Oralda Táýelsizdiktiń 30 jyldyǵyna oraı jańa mektep paıdalanýǵa beriletinin jazǵan bolatynbyz.