Batys Qazaqstanda 42 jastaǵy áıel bosaný ústinde kóz jumdy

ORAL. QazAqparat – Batys Qazaqstan oblysynda 42 jastaǵy áıel bosaný ústinde kóz jumdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, Aqsaı qalasynda turǵan áıeldiń bul besinshi júktiligi, úshinshi ret bosanýy bolatyn.

Merziminen buryn bala joldasy ajyraǵan áıel 10 qarasha kúni Oraldaǵy qalalyq kópbeıindi aýrýhanaǵa jetkizilgen.

«Kúrt qan joǵaltý saldarynan qursaǵyndaǵy shaqalaǵy shetinep ketken áıeldiń aýrýhanaǵa túsken kezde jaǵdaıy aýyr bolǵan. Shuǵyl ota jasaý kezinde klınıkalyq ólim tirkelgen. Júrek-ókpege jansaqtaý sharalary júrgizilip, júrek qyzmeti qalpyna keltirilgen. Alaıda jasalynǵan sharalarǵa qaramastan, júregi qaıta toqtap qalǵan», dep habarlady vedomstvodan.

Eske sala keteıik, budan buryn Oralda túıreýish jutyp qoıǵan alty aılyq sábıdiń kóz jumǵanyn jazǵan bolatynbyz.