Batys Qazaqstanda 418 myń sharshy metr turǵyn úı paıdalanýǵa berildi

ORAL. QazAqparat – Batys Qazaqstan oblysynda bıyl barlyq qarjy kózderinen 586,7 myń sharshy metr turǵyn úıdi iske qosý kózdelip otyr, dep habarlaıdy QazAqparat tilshisi.

BQO qurylys basqarmasynyń basshysy Álibek Antazıev óńirlik kommýnıkatsııalar qyzmeti alańynda ótken brıfıngide málim etkendeı, bıylǵy on aıda sonyń 418,3 myń sharshy metri paıdalanýǵa berildi (ótken jyldyń on aıymen salystyrǵanda 105,3 paıyz).

Qurylys jumystarynyń kólemi 141,1 mlrd teńgege jetip, 107,9 paıyzdy qurady.

Basqarma basshysynyń sózine qaraǵanda, bıyl «Nurly jer» baǵdarlamasy aıasynda 13 kóppáterli (1784 páter), aýyldarda 108 (716 páter) turǵyn úı, oǵan qosa 46 ınjenerlik-kommýnıkatsııalyq ınfraqurylym nysany qurylysy júrgizilýde. Baǵdarlama aıasynda osy maqsatqa 18 mlrd teńge bólindi.

Jyl sońyna deıin oblys boıynsha 5 kóppáterli (596 páter) jáne eldi mekenderde 93 (509 páter) turǵyn úıdi, barlyǵy 1105 páterdi salyp bitirý josparlanyp otyr.

Qazirgi tańda Oral qalasynda jergilikti atqarýshy organdarda kezekte turǵandar úshin 198 páterlik jáne Jánibek aýdany Jánibek aýylynda eki 12 páterlik turǵyn úı paıdalanýǵa berildi.

«Sońǵy jyldary «Nurly jer» baǵdarlamasy aıasynda Oral qalasynyń soltústik-shyǵys bóliginde jáne Zachagan kentinde jańa shaǵynaýdandar boı kóterdi. Sonymen qatar «Aqjaıyq» shaǵynaýdanynda barlyq magıstraldyq ınjenerlik jeliler júrgizilip, «Otbasy bank» AQ salymshylary úshig 9 qabatty 244 páterlik turǵyn úıdiń qurylys-montaj jumystary bastaldy. Oǵan qosa 24 kóppáterli turǵyn úıdiń (onyń 14-i 9 qabatty, 10-y bes qabatty) jobalyq-smetalyq qujattamasy jasalyp, saraptamadan ótýde. «Aqjaıyq» ÁKK arqyly kommertsııalyq turǵyn úı qurylysy úshin jer telimderi bólindi. Atap aıtqanda, «Qazhol» JShS jáne «Bolashaq-T» JShS qurylys salmaqshy. «Aqjaıyq» shaǵynaýdanynda jalpy sany 20-ǵa jýyq kommertsııalyq turǵyn úı salý oılastyrylýda. Sondaı-aq densaýlyq saqtaý salasy men polıtsııa qyzmetkerleri úshin áleýmettik turǵyn úı salý josparlanýda, ınvestory – «Qaz-Hol» JShS. Kúni búgin «Nurly jer» baǵdarlamasy aıasynda aýylda turǵyn úı salý tetigi daıyndalýda, bul da óńirdegi qurylysqa serpin beretin bolady», - dedi Á.Antazıev.

Eske sala keteıik, budan buryn Táýelsizdiktiń 30 jyldyǵyna oraı Oral qalasynda dzıýdodan Qazaqstan chempıonaty ótetinin jazǵan bolatynbyz.

Sondaı-aq BQO-da paıdalanylmaı jatqan 174 myń gektar jer memleketke qaıtaryldy.