Batys Qazaqstanda 40 tonnalyq júk kóligi joldan túsip ketti

ORAL. QazAqparat – Batys Qazaqstan oblysynda 40 tonnalyq júk kóligi joldan túsip ketti, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkenindeı, oqıǵa 19 naýryz kúni respýblıkalyq mańyzy bar Samara-Shymkent jolynyń 523-524 shaqyrymynda boldy.

Aýyr júk (40 tonna) kóliginiń joldan túsip ketkeni jónindegi habar kelgen boıda oqıǵa ornyna Shyńǵyrlaý, Syrym aýdany TJ qyzmetkerleri jedel jetti. Olar aýdan ákimdiginiń kómegimen júk kóligin tasjolǵa shyǵardy.

Kólik ıesi Almaty oblysynan Reseıdiń Orynbor óńirine bara jatqan bolyp shyqty. Ol kómek qolyn sozǵandarǵa shynaıy alǵysyn jetkizdi.

Sol sekildi Syrym aýdany TJ bóliminiń qyzmetkerleri Samara-Shymkent jolynyń 463-shaqyrymynda jol janyndaǵy qalyń qarǵa túsip ketken jylqyny da shyǵaryp jiberdi.

Eske sala keteıik, budan buryn Batys Qazaqstanda bir kúnde eki kóliktiń órtengenin jazǵan bolatynbyz.

TJ departamenti málimetine qaraǵanda, jyl basynan beri jıyrmadaı avtokólik otqa orandy.