Batys Qazaqstanda 4 júkti áıel koronavırýs indetin juqtyrǵan
ORAL. QazAqparat – Batys Qazaqstan oblysynda tórt júkti áıel koronavırýs indetin juqtyrǵan, dep habarlaıdy QazAqparat tilshisi.
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmeti alańynda ótken brıfıngte málim etkendeı, qazirgi tańda olardyń ekeýi oblystyq juqpaly aýrýlar aýrýhanasynda emdelýde.
Qalǵan ekeýi dárigerlerdiń baqylaýynda.
Sondaı-aq indet oqýshylar arasynda da tirkelip otyr. 12 balanyń tórteýi qyrkúıekte, qalǵan 8-i qazan aıynda otbasy múshelerinen juqtyrǵan. Onyń beseýi jazylyp shyqty, jeteýinde aýrý belgilerinsiz ótýde.
Basqarma basshysy orynbasarynyń sózine qaraǵanda, kúni búginge deıin oblysta 7064 adamnan koronavırýs tabylsa, sonyń 6846-sy emdelip shyqty. 121 adam kóz jumdy.
Pnevmonııaǵa shaldyqqan 139 naýqastyń 92-si statsıonarda, 47-si ambýlatorlyq em alýda.
Oblysta 185 tósektik tórt karantındik statsıonarda 41 adam bolsa, 333 tósektik alty juqpaly aýrýlar statsıonarynda 103 adam emdelýde. 26 tósektik jansaqtaý bóliminde 7 adam jatyr. Ottegi kontsentratoryna 2 adam qosylǵan.
«2044 tósektik rezervtik oryndar ázirlense, sonyń 1269-y juqpaly aýrýlar, 775-i karantındik statsıonarda. Oǵan qosa «Juldyz» shaǵynaýdanynda quny 7,2 mlrd teńgeni quraıtyn, 200 tósektik modýldik aýrýhana qurylysy júrgizilýde. Qazirgi tańda jumystyń 85 paıyzy oryndalǵan. Osy aıdyń aıaǵynda paıdalanýǵa berý kózdelýde. Oblystyq juqpaly aýrýlar aýrýhanasynan ereksheligi, onda kompıýterlik tomografııa bolady. Dıagnostıka da júrgiziledi. Qajetti qural-jabdyqtar ornatylyp, kadrlar da iriktelýde», dedi G.Ábdirahmanova.
Eske sala keteıik, budan buryn BQO-da aýyl ákimi karantınge qaramastan ulynyń úılený toıyn ótkizgenin, bir apta ishinde 1500-ge jýyq júrgizýshiniń shekaradan ótkenin jazǵan bolatynbyz.
