Batys Qazaqstanda 38 dala órtiniń 35-i sóndirildi
BQO TJ departamentiniń baspasóz qyzmetinen málim etkenindeı, sonyń ishinde 10 sharshy metrden 7 myń gektarǵa deıingi aýmaqta janǵan 38 qurǵaq shóp órtiniń 35-i sóndirildi.
Qazirgi kezde úsheýi, atap aıtqanda, Kaztalov aýdany Kókkútir qystaǵynda (4 800 ga), Syrym aýdany Toǵanas aýylynda (7 myń ga), Aqjaıyq aýdanynda Tasqala aýdany Qazaqstan aýyldyq okrýgimen shektesetin aýmaqta (6 700 ga) qurǵaq shóptiń janýy baqylaýda ustalyp otyr.
TJ departamentiniń daǵdarys ortalyǵynda quramyna barlyq kommýnaldyq qyzmetter kirgen jedel shtab quryldy.
Kaztalov aýdanynda jalyndy aýyzdyqtaý úshin keshe saǵat 21.17-de oblys ortalyǵynan qosymsha kúsh-quraldar (24 adam, 3 tehnıka) jiberildi.
Syrym aýdany Toǵanas aýyly mańynda 242 adam (53 tehnıka) jumys istep jatyr.
Aqjaıyq aýdany Shymqudyq qystaǵy mańyndaǵy órtke 216 adam (35 tehnıka) jumyldyrylǵan.
«Sonymen qatar keshe Oral qalasynda kúshti jel saldarynan jeke sektor ishinara elektr jaryǵynsyz qaldy. «Batys Qazaqstan elektr jelilerin taratý kompanııasy» JShS kúshimen (40 adam, 10 tehnıka) qalpyna keltirý jumystary júrgizilýde. Qazirgi kezde birqatar aýmaqta 1 898 abonent elektr jaryǵynsyz qalyp otyr», dep habarlady vedomstvodan.
Eske sala keteıik, budan buryn BQO-da dala órti eldi mekenge jaqyndap, 44 adam aýyldan kóshirilgenin jazǵan edik.
Terekti aýdany Áıtıev aýyly mańyndaǵy órt joıylǵannan keıin 44 adam úılerine oraldy.
