Batys Qazaqstanda 31 mektepte 42 synyp karantınge jabyldy

ORAL. QazAqparat – Batys Qazaqstan oblysynda qala men aýdandar bas memlekettik sanıtar dárigerleriniń qaýlysyna sáıkes 31 mektepte 42 synyp karantınge jabyldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, 11 qańtarda bastalǵan úshinshi toqsanda 127 oqýshydan koronavırýs anyqtaldy.

Olardyń 49-y dástúrli túrde, 78-i qashyqtan oqıdy. Al oqý jyly bastalǵannan beri barlyǵy 341 oqýshydan (164-i dástúrli túrde, 177-si qashyqtan bilim alady) indet tabyldy. Nurlybek Ermekulynyń sózine qaraǵanda, oblysta osy kezge deıin 11397 adam juqpaly dertke shaldyqsa, sonyń 9267-si jazylyp shyqty. 199 adam kóz jumdy.

Jyl basynan beri 2174 adam syrqattansa, sonyń 1354-inde aýrý belgisi bar, 820-sy –sımptomy joqtar.

KVI juqtyrǵandarmen qarym-qatynasta bolǵan 2782 adam medıtsınalyq baqylaýǵa alyndy.

Sońǵy aptada (29 qańtar – 4 aqpan) ótken aptamen (22-28 qańtar) salystyrǵanda, indettiń 3,7 paıyzǵa (636-dan 613-ke) tómendegeni baıqalady.

Koronavırýs jumys isteıtin adamdar (903, 41,5 paıyz), zeınetkerler (461, 21,2 paıyz) jáne jumyssyzdar (387, 17,8 paıyz) arasynda kóbirek anyqtalyp otyr.

Bıyl zerthanalarda barlyǵy 62974 zertteý júrgizildi.

Jyl basynan beri memlekettik shekaradan ótkender ishinen 3 jolaýshydan jáne 7 júrgizýshiden indet tabyldy.

«Oblysta monıtorıngtik toptar jumysyn jalǵastyrýda.

Jyl basynan beri 608 reıd júrgizilip, 5874 nysan tekserildi. 22 nysanda karantın talabyn buzýshylyq anyqtaldy. 49 hattama toltyrylyp, 2,9 mln astam teńgege aıyppul salyndy», dedi N.Mustaev.

Eske sala keteıik, budan buryn Batys Qazaqstanda 240 adamnyń koronavırýsqa qarsy egilgenin jazǵan bolatynbyz.