Batys Qazaqstanda 300 shaqyrym jol jóndeýden ótedi
NUR-SULTAN. QazAqparat – 2021 jyly Batys Qazaqstan oblysynda 300 shaqyrym joldy jóndeý josparlanǵan, dep habarlaıdy QazAqparat.
«2020 jyldyń qorytyndysy boıynsha 42,3 mlrd teńgege 436 shaqyrym avtojol jóndeldi. 2021 jyly – 35,1 mlrd teńgege shamamen 300 shaqyrym joldy jóndeý josparlanǵan. Bıyl oblystyń ońtústik-batys aýdandaryna avtojoldar qurylysy jandandyryldy. Bólingen 20 mlrd teńgege 118 shaqyrym jol jóndeý josparlanýda. Indýstrııa jáne ınfraqurylymdyq damý mınıstrligi bizdiń ótinishimizdi qoldap, «Atyraý-Oral» trassasyn qaıta jóndeý boıynsha jobalyq-smetalyq qujattama ázirleýdi bastady», - dedi óńir ákimi Ǵalı Esqalıev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, 2021 jyly kezekte turǵandar úshin Oral jáne Aqsaı qalalarynda - 324 páter, aýyldyq jerlerde – 139 páter salynady.
«Onyń ishinde jeńildetilgen nesıe baǵdarlamasy boıynsha 1042 páter salý josparlanǵan. Sondaı-aq, dárigerler men polıtsııa qyzmetkerleri úshin maqsatty baǵdarlama boıynsha 120 páterdiń qurylysy bastalady», - dedi Ǵ. Esqalıev.
