Batys Qazaqstanda 300-den astam naýqas ınfektsııalyq statsıonarlarda em alyp jatyr
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, statsıonarlar 28,8 paıyzǵa tolǵan.
Onyń sózine qaraǵanda, 94 tósektik jansaqtaý bólimshesinde 37 adam (tolymdylyǵy – 39,3 paıyz) emdelýde. Sonyń ishinde 34-i aýyr, úsheýi asa aýyr halde. Úsheýi ınvazıvti jasandy tynys alý apparatyna, 14-i ınvazıvti emes osyndaı qurylǵyǵa qosylǵan. 26 naýqas qosymsha júrek-qan tamyrlary aýrýlaryna, 8-i qant dıabetine shaldyqqan.
«Oblystyq jedel járdem stantsııasyna sońǵy aptada barlyǵy 6 151 qońyraý shalynsa, sonyń ishinde 776-sy (12,6 paıyzy) KVI-men baılanysty boldy. 159 adam statsıonarǵa jatqyzyldy. Ótken táýlikte 830 shaqyrtýdyń 99-y koronavırýsqa qatysty bolyp, 26 naýqas aýrýhanaǵa tústi. Kúni búgin oblys boıynsha 959 adam ambýlatorlyq em alýda, sonyń ishinde 69 paıyzynda aýrý jeńil ótýde, 8 paıyzy – ortasha aýyr, 23 paıyzy – sımptomy joqtar», dedi A.Qalıbekov.
Óńirde pandemııa bastalǵannan beri koronavırýs juqtyrǵan 37 472 adamnyń 29 912-si nemese 79,8 paıyzy jazylyp shyqty. Solardyń 13 998-i statsıonarda, 15 914-i ambýlatorııalyq em aldy. Іndetten barlyǵy 764, sonyń ishinde bıyl 595 naýqas kóz jumdy.
Basqarma basshysy qala jáne aýdan emhanalarynda «Spýtnık V», «QazVac», «Vero Cell» vaktsınalarynyń jetkilikti kólemde bar ekendigin jetkizdi.
Eske sala keteıik, budan buryn Batys Qazaqstanda sońǵy tórt kúnde 200-ge jýyq adamnan koronavırýs tabylǵanyn jazǵan bolatynbyz.
Sondaı-aq 500-ge jýyq oqýshydan koronavırýs anyqtaldy.