Batys Qazaqstanda 3 myńnan astam medqyzmetker koronavırýs ekpesin saldyrdy
ORAL. QazAqparat – Batys Qazaqstan oblysynda 3 myńnan astam medıtsına qyzmetkeri koronavırýsqa qarsy ekpe saldyrdy, dep habarlaıdy QazAqparat tilshisi.
BQO densaýlyq saqtaý basqarmasy basshysynyń orynbasary Gúlnár Ábdirahmanova óńirlik kommýnıkatsııalar qyzmeti alańynda ótken brıfıngide málim etkendeı, osy ýaqytqa deıin óńirge 9500 doza vaktsına jetkizilse, sonyń 5250-i – birinshi, 4250-i – ekinshi komponent.
Gúlnár Maqsotqyzynyń sózine qaraǵanda, kúni búginge deıin 5243 adam birinshi komponentpen (99,9 paıyz) egilip úlgerdi. Sonyń 3027-si nemese 57,7 paıyzy – medıtsına qyzmetkerleri, 1222-si (23,3 paıyzy) – pedagogtar, 275-i (5,2 paıyzy) – quqyq qorǵaý organdarynyń qyzmetkerleri, 719-y (13,8 paıyzy) – basqa adamdar.
«Vaktsınatsııa keste boıynsha júrgizilýde. Aldymen koronavırýs juqtyrý deńgeıi joǵary sala ókilderi ekpe alýda. Ár kezeń tolyq qamtylǵan saıyn halyqtyń qalǵan bóligine kezek keletin bolady», dedi G.Ábdirahmanova.
Osy kezge deıin óńirde 15250 adam indet juqtyrsa, sonyń 12367-si nemese 81,1 paıyzy jazylyp shyqty.
Oblysta 241 adam kóz jumdy. Jyl basynan beri 73 adam (qańtarda – 28, aqpanda – 15, naýryzda – 30) qaıtys bolsa, sonyń 39-y – áıelder, 34-i – erler. 61-i qalada, 12-si aýdandarda ómirden ozdy.
Qazirgi tańda 195 tósektik 4 karantındik statsıonarda 11 adam emdelýde. Al 696 tósektik 9 ınfektsııalyq statsıonarda jatqandar sany 410-ǵa jetti. Sonyń ishinde 22-si jansaqtaý bólimshesinde em alýda.
«Aýrýdyń alǵashqy belgileri baıqalǵan boıda eshqaıda barmaı, úıge dárigerdi shuǵyl shaqyrtý kerek. Óıtkeni emhanalarda kezek kútkende, kóshede ınfektsııany basqa adamdarǵa juqtyrý qaýpi joǵary. Sondaı-aq ózi qosymsha aýrý jamap alýy múmkin. Bul derttiń asqynýyna, tipti ólimge soqtyrýy yqtımal. Betperde rejımin, áleýmettik araqashyqtyqty saqtap, adamdar kóp jınalatyn qoǵamdyq oryndarǵa barýdan aýlaq bolyp, sonymen qatar ózge qalalarǵa sapar shegýdi toqtata turý qajet», dedi G.Ábdirahmanova.
Eske sala keteıik, budan buryn BQO-da sońǵy tórt kúnde 364 adamnyń koronavırýs juqtyrǵanyn jazǵan bolatynbyz.
