Batys Qazaqstanda 277 dáriger jetispeıdi
ORAL. QazAqparat – Memleket basshysynyń tapsyrmasyna sáıkes epıdemııaǵa qarsy is-sharalarǵa qatysqan 14 myńnan astam mamanǵa 3,5 mlrd teńge kóleminde qoldaý kórsetildi, dep habarlaıdy QazAqparat tilshisi.
Oblys ákimi Ǵalı Esqalıevtiń turǵyndarmen onlaın kezdesýinde málim etkenindeı, qyzmette eren eńbegimen kózge túsken 15 medıtsına qyzmetkeri «Parasat», «Qurmet», «Eren eńbegi úshin», «Shapaǵat» sııaqty orden, medaldarmen nagradtaldy.
Óńir basshysynyń sózine qaraǵanda, oblysta medıtsına kadrlary máselesi kúrdeli bolyp otyr. Ókinishke qaraı, oblysta 277 dáriger jetispeıdi, sonyń ishinde 173-i qalada, 104-i aýdandarda. Degenmen 2019 jylmen salystyrǵanda, kadr tapshylyǵynyń 10 paıyzǵa tómendeýi baıqalady. 2020 jyly oblysqa barlyǵy 106 jas maman keldi.
Óńir dárigerleri qıyn otalardy jasaý boıynsha tájirıbe jınaqtaý ústinde. Mysaly, qalalyq kópbeıindi aýrýhanada alǵash ret ınsýlt aldy kúıdegi naýqastardyń mı arterııalaryna óte kúrdeli otalar jasaldy. Al kardıologııalyq ortalyqta alǵash ret jańa bosanǵan naýqastyń qolqa klapanyn aýystyrý otasy sátti iske asty.
«Medıtsınalyq ınfraqurylymdy jaqsartý maqsatynda Prezıdent tapsyrmasyna sáıkes úsh aı merzim ishinde jańa modýldi ınfektsııalyq aýrýhana turǵyzylyp, qazir halyqqa qyzmet kórsetip jatyr. 2020 jyly 1,7 mlrd teńgege 15 densaýlyq saqtaý nysanyna kúrdeli jóndeý júrgizildi. Tuńǵysh Prezıdent qorynyń qoldaýymen oblystyq balalar kópbeıindi aýrýhanasynda jabdyqtalǵan balalardy ońaltý ortalyǵy ashyldy. Sondaı-aq 37 sanıtarlyq avtokólik satyp alynyp, jedel járdem avtokólikteri 100-ge deıin ulǵaıdy. Aýyl turǵyndarynyń medıtsınalyq kómekke qoljetimdiligin arttyrý úshin 9 jyljymaly medıtsınalyq keshen satyp alynyp, aýdandarǵa taratyldy», dedi Ǵalı Nájimedenuly.
Eske sala keteıik, budan buryn BQO-da turǵyn úılerdi iske qosý 9,1 paıyzǵa artqanyn jazǵan bolatynbyz.
