Batys Qazaqstanda 2652 dana kıik múıizi tárkilendi
ORAL. QazAqparat – Batys Qazaqstan oblysynda ótken jyly 2652 dana kıik múıizi tárkilendi, dep habarlaıdy QazAqparat tilshisi.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Qaırat Qadeshevtiń óńirlik kommýnıkatsııalar qyzmeti alańynda málim etkenindeı, óńirde kıikter Bókeı ordasy, Jánibek, Qaztalov, Jańaqala, Tasqala jáne Aqjaıyq aýdandarynyń jerin mekendeıdi.
Qaırat Temirǵalıulynyń sózine qaraǵanda, 2019 jylǵy sońǵy sanaq oblysta kıik sany 217 myńǵa jetkendigin kórsetti. 2020 jyly indetke baılanysty josparly sanaq júrgizilgen joq. Bıyl sanaqty sáýir aıynda ótkizý josparlanyp otyr. Monıtorıng boıynsha kıik sanynyń qarqyndy túrde ósip kele jatqany baıqalady.
Kıikti aýlaýǵa, onyń bólikterimen aınalysýǵa 2023 jylǵa deıin tyıym salynǵan.
Ótken jyly kıikti aýlaýǵa jáne onyń bólikterimen zańsyz aınalysýǵa baılanysty 44 qylmystyq is qozǵalyp, 2019 jylǵydan (26) edáýir ósti. 9 qylmystyq is sotta qaralyp, 10 adam qylmystyq jaýapkershilikke tartyldy. Sonyń ishinde eki adam 6,6 jylǵa bas bostandyǵynan aıyryldy. 1 qylmystyq is toqtatyldy. Qalǵan ister boıynsha tergeý amaldary jalǵasýda.
Quqyq buzýshylardan 2652 dana múıizge qosa atylǵan 491 kıik ushasy tabyldy. Sondaı-aq 8 avtokólik, 2 qarshana, 2 mototsıkl jáne 9 atys qarýy tárkilendi. Sotpen 62,5 mln astam teńge óndirildi.
Sońǵy jyldary kıiktiń jaıylymdyq jáne shabyndyq jerlerdi otap ketetini jóninde turǵyndardan aryz-shaǵymnyń jıilegeni belgili.
Buǵan baılanysty ınspektsııa basshysy kıik sanynyń rettelýi bolashaqtyń enshisinde ekendigin, ǵylymı negizde sheshim qabyldanatynyn jetkizdi.
«Bókeıorda» tabıǵı rezervatyn qurýǵa baılanysty aıtarym, bul jaǵynan Batys Qazaqstan oblysy kenje qalyp otyr. 2013 jyly tehnıkalyq-ekonomıkalyq negizdeme jasalǵanymen, zańdy tulǵa áli belgilengen joq. Qazirgi kezde munymen ýákiletti organ – Orman sharýashylyǵy jáne janýarlar dúnıesi komıteti tikeleı aınalysýda. Qujattar tıisti organdarmen kelisilýde. Brakonerlerden tárkilengen múıizderdi paıdaǵa asyrý jaǵy qarastyryla ma? degen saýalǵa oraı munyń mańyzdy másele ekendigin aıtqym keledi. Keıbir normatıvter bir-birine qaıshy keledi. Árıne, kıik múıizderinen bıýdjetke zańdy túrde tabys tússe, ol utymdy bolar edi. Bul máselemen de atalǵan komıtet shuǵyldanýda», dedi Q.Qadeshev.
Eske sala keteıik, budan buryn BQO turǵynynyń mal qorasynan 42 dana kıik múıizi tabylǵanyn jazǵan bolatynbyz.
