Batys Qazaqstanda 250 tonna pishen órtenip ketti
BQO TJ departamentiniń baspasóz qyzmeti málim etkenindeı, oqıǵa 22 tamyz kúni Syrym aýdany Josaly aýyldyq okrýginiń ortalyǵy Qońyr aýylynyń shetinde boldy.
Saǵat 05.59-da «Janǵoja-S» sharýa qojalyǵy aýmaǵynda 1 myń sharshy metrdi qamtyǵan úıýli turǵan 250 tonna pishen otqa orandy. Jalyn sodan keıin aýmaǵy 300 sharshy metr qora-qopsyny sharpydy.
Zardap shekkender joq.
«Tilsiz jaý» saǵat 19.11-de aýyzdyqtaldy.
Jalpy, sońǵy kúnderi óńirde órt jıilep tur. 20 tamyz kúni Oral qalasy 1-saıajaı qoǵamdastyǵyna qarasty «Avtomobılıst» saıajaı qoǵamy mańynda 20 gektar qurǵaq shóp pen 10 gektar orman órtendi.
TJ departamenti (51 qyzmetker, 10 tehnıka), «Estoral» JShS (8 qyzmetker, 2 teplohod), orman sharýashylyǵy mekemesi (5 qyzmetker, 1 tehnıka) jáne «Jaıyq taza qala» JShS (2 qyzmetker, 2 tehnıka) kúshimen órt 21 tamyz kúni saǵat 00.53-te oqshaýlanyp, 22 tamyzda 09.28-de tolyqtaı joıyldy.
Sol sekildi 20 tamyz kúni Báıterek aýdany ıAnaıkın aýylynan 15 shaqyrym jerde 60 gektar aýmaq (40 gektary – orman) otqa orandy. Bul órt TJ departamenti bastaǵan mekemeler kúshimen 21 tamyzda saǵat 12.01-de oqshaýlanyp, 22 tamyzda 20.08-de aýyzdyqtaldy.
Oǵan qosa 22 tamyz kúni saǵat 14.32-de Aqjaıyq aýdany Býdarın aýyldyq okrýginde shamamen 10 gektar qurǵaq shóp pen 4 gektar orman jalynǵa sharpyldy.
Sondaı-aq 22 tamyz kúni saǵat 19.51-de Báıterek aýdany Ozernyı aýyly mańynda qurǵaq shóp janyp, ormanǵa qaýip tóndirýde.
Bul eki órt sóndirilý ústinde.
Eske sala keteıik, budan buryn BQO-da taǵy bir orman órti tirkelgenin jazǵan bolatynbyz.