Batys Qazaqstanda 2400-den astam júkti áıel JRVI-ge shaldyqty
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngte málim etkendeı, jiti respıratorlyq vırýstyq ınfektsııamen (JRVI) syrqattanǵandar sany ótken epıdemıologııalyq maýsymmen salystyrǵanda, 21,1 paıyzǵa ósti.
Onyń aıtýynsha, ótken jylǵy 1 qazannan bastap óńirde 42 308 adam JRVI-men aýyrdy. Sonyń ishinde 26 422-si nemese 62,4 paıyzy – 14 jasqa deıingi balalar. 1 jasqa deıingi 2031 sábı de syrqattanǵan.
Oblystyń 158 mektebinde 3409 oqýshy (8,2 paıyz) atalmysh dertke shaldyqqan.
Ásirese, aýa raıynyń salqyndaýyna baılanysty jeltoqsan men qańtarda 29 270 adamnyń (18 201-i – 14 jasqa deıingi balalar) JRVI-men aýyrǵany tirkeldi.
Departament basshysynyń sózine qaraǵanda, oblysta tumaý boıynsha epıdemıologııalyq jaǵdaı turaqty. Barlyǵy 92 tumaý (V shtamy – 66, (H1N1) shtamy – 26) tirkelse, sonyń ishinde 35-i – 14 jasqa deıingiler, 17-si – júkti áıelder. Tumaýmen aýyrǵandardyń 62-si, sonyń ishinde 17 júkti áıeldiń bári de aýrýhanaǵa jatqyzyldy.
Sonymen qatar bıylǵy 1 qańtardan beri oblys boıynsha 94 adam koronavırýspen syrqattansa, sonyń 56-sy Oral qalasynyń úlesine tıedi. Bul – ótken aıdyń osy kezeńimen salystyrǵanda, 1,6 esege tómen.
«Tumaý men koronavırýstyń aldyn alýdyń eń tıimdi tásili – vaktsınatsııa. Sonymen qatar jeke saqtyq sharalaryn saqtap, jabyq oryndarda betperde kııý qajet. Adamdar kóp jınalatyn jerge barýdan tartynyp, JRVI men tumaýdyń alǵashqy belgileri paıda bolǵan kezde dereý dárigerge qaralý qajet», - dedi M.Aryspaev.
Foto: sites.wp.odu.edu