Batys Qazaqstanda 240 adam koronavırýsqa qarsy egildi
ORAL. QazAqparat – Batys Qazaqstan oblysynda 240 adam koronavırýsqa qarsy egildi, dep habarlaıdy QazAqparat tilshisi.
BQO densaýlyq saqtaý basqarmasynyń baspasóz qyzmeti málim etkenindeı, sonyń ishinde 53 dáriger, 161 orta jáne 21 kishi býyn medıtsına qyzmetkeri ekpe aldy.
Sondaı-aq oblystyq sanıtarlyq-epıdemıologııalyq baqylaý departamentiniń 4 qyzmetkeri egildi.
«Qazirgi kezde densaýlyq saqtaý jáne sanıtarlyq-epıdemıologııalyq qyzmet salasy qyzmetkerleri egilýde. Naýryzda muǵalimderge, sáýirde memlekettik qyzmetshilerge kezek keledi», dep habarlady basqarmanyń baspasóz qyzmeti.
Basqarma málimetine qaraǵanda, sońǵy táýlikte 109, bir aptada 629 adam koronavırýs juqtyrdy.
Kúni búgin juqpaly aýrýlar aýrýhanalarynda 291, karantındik statsıonarlarda 22 adam em alýda. 24 adam jansaqtaý bóliminde jatyr.
Jyl basynan beri indet juqtyrǵan balalar sany 144-ke jetti.
Eske sala keteıik, budan buryn BQO ákiminiń orynbasary men bas memlekettik sanıtar dárigeriniń ekpe saldyrǵanyn, Oralda bir kúnde 80 adamnan koronavırýs anyqtalǵanyn jazǵan bolatynbyz.
