Batys Qazaqstanda 21701 ákimshilik quqyqbuzýshylyqtyń joly kesildi
ORAL. QazAqparat - Batys Qazaqstan oblysynda bıylǵy tórt aıda 21701 ákimshilik quqyqbuzýshylyqtyń joly kesildi, dep habarlaıdy «QazAqparat» tilshisi.
BQO ishki ister departamenti jergilikti polıtsııa qyzmetinen túsken málimetke qaraǵanda, sonyń ishinde QR Ákimshilik quqyqbuzýshylyq kodeksiniń 434-babyna sáıkes 1855 usaq buzaqylyq tirkelgen. Munyń 1151-i ortaq paıdalaný oryndaryn lastaǵany úshin jaýapqa tartylǵan. Sondaı-aq 4607 adam qoǵamdyq oryndarda alkogoldy ishimdikter ishkeni úshin 440-bapqa sáıkes jazaǵa ilikken. Al 2438 adam belgilenbegen oryndarda temeki shekken (441-bap). Sol sekildi tynyshtyqty buzǵan 536, ıt pen mysyqty ustaý erejesin elemegen 854, aýmaqty abattandyrý erejesin saqtamaǵan 1914 adam ákimshilik jaýapqa tartyldy.
Aıta keteıik, Elbasynyń «Múldem tózbeýshilik» qaǵıdatyn ornatý týraly tapsyrmasyna sáıkes jyl basynan beri óńirde oblys prokýratýrasy jergilikti atqarýshy organdarmen birlesip qolǵa alǵan «Ózińnen basta!» jobasy júzege asyrylyp keledi. Osy baǵytta «Múldem tózbeýshilik» jedel aldyn alý sharasy júrgizilýde.
