Batys Qazaqstanda 21 jastaǵy jigit Shaǵanǵa batyp ketti

ORAL. QazAqparat – Batys Qazaqstan oblysynda 21 jastaǵy jigit Shaǵanǵa batyp ketti, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkenindeı, oqıǵa 5 shilde kúni keshkisin Báıterek aýdany Asan aýylynda boldy.

«Saǵat 19.54-te «Rancho» kafesi tusynda Shaǵan ózeninen 21 jastaǵy jigittiń denesi shyǵaryldy. Onyń dosynyń sózine qaraǵanda, jigit saǵat 18.35-te shomylýǵa jabdyqtalmaǵan jerden túsip, sýǵa batyp ketken. Oqıǵanyń sebep-saldary anyqtalyp jatyr. Sot-medıtsınalyq saraptama taǵaıyndaldy. BQO TJ departamenti aldaǵy demalys kúnderiniń qatty ystyq bolatyndyǵyn eskere otyryp, turǵyndarǵa sýdaǵy qaýipsizdik erejelerin qatań saqtap, jabdyqtalmaǵan jerden túspeý, sondaı-aq balalardy qaraýsyz qaldyrmaý kerektigin eske salady», dep habarlady.

Departament málimetine qaraǵanda, keshe saǵat 18.40-ta sondaı-aq Oral qalasy Jelaev kenti aýdanynda «Karer» jasandy sý qoımasynda 16 jastaǵy eki jasóspirim sýǵa ketip qala jazdady. Jabdyqtalmaǵan jerden sýǵa túsken olardy qutqarýshylar aman alyp qaldy.

Osymen bıyl óńirde 2 adam sýǵa ketse, onyń bireýi – jasóspirim. 6 adam qutqarylsa, sonyń beseýi – balalar.