Batys Qazaqstanda 209 myńǵa jýyq adam koronavırýsqa qarsy vaktsına saldyrdy

ORAL. QazAqparat – Batys Qazaqstan oblysynda 208 595 adam koronavırýsqa qarsy vaktsınanyń birinshi komponentin saldyrdy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti málim etkenindeı, bul – óńirde egilýi kerek turǵyndardyń (360 myń) 57,9 paıyzy.

Sondaı-aq 175 493 adam (48,7 paıyz) ekinshi komponentti saldyrdy.

Aýmaqtyq bólinister boıynsha Jánibek (І komponent – 72,0 paıyz, ekinshisi – 62,8 paıyz), Tasqala (68,2 jáne 57,4 paıyz) aýdandary alda keledi. Kósh sońynda Jańaqala aýdany (43,3 jáne 35,5 paıyz) tur.

Oral qalasynda egilýi kerek 215 461 turǵynnyń 110 263-i (51,2 paıyz) birinshi, 92 931-i (43,1 paıyz) ekinshi komponentti qabyldady.

Departament málimetine qaraǵanda, oblys boıynsha 16 320 pedagog (qamtylý kórsetkishi – 103,96 paıyz) birinshi, 14 236-sy (90,68 paıyz) ekinshi komponentpen egildi. Sondaı-aq 9604 medıtsına qyzmetkeri (102,17 paıyz) birinshi, 8531-i (90,76 paıyz) ekinshi ekpeni aldy. Sol sekildi ónerkásip kásiporyndarynyń 3036 qyzmetkeri (103,79 paıyz) birinshi, 2655-i (90,77 paıyz) ekinshi komponentti qabyldady.

Óńirde 2792 memlekettik qyzmetshi (150,51 paıyz) vaktsınanyń birinshi, 2489-y (134,18 paıyz) ekinshisimen egildi.

Batys Qazaqstanǵa vaktsınatsııa bastalǵannan beri 510 720 doza (275 080 doza – І, 235 640 doza – ІІ komponent) vaktsına jetkizildi. Qazirgi kezde barlyǵy 47 egý kabıneti jumys jasap jatyr.

Eske sala keteıik, budan buryn BQO aýrýhanalarynda 500-den astam naýqastyń koronavırýstan em alyp jatqanyn, sońǵy tórt táýlikte 335 adamnan vırýs anyqtalǵanyn jazǵan bolatynbyz.