Batys Qazaqstanda 200-ge jýyq dáriger tapshy
BQO ákimdiginde ótken oblystyq densaýlyq saqtaý basqarmasynyń alqa májilisinde, sondaı-aq 120 densaýlyq saqtaý nysanynyń ınternetke qosylmaǵany, aýdandardaǵy avtokólikter GPS-navıgatsııa júıesimen qamtamasyz etilmegeni aıtyldy. Aýyldyq jerlerde medıtsınalyq avtokólikter úshin garajdar jasaqtalmaǵan, sonymen qatar keń taralǵan aýrý túrleri boıynsha turǵyndardy aqparattandyrý jumysy jetkiliksiz bolyp otyr.
Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynda densaýlyq saqtaý salasy aldyna da tyń mindetter qoıyldy. Sonyń ishinde densaýlyq saqtaý isiniń negizinen aýrýdyń aldyn alýǵa baǵyttalýyna mańyz berildi. Sondaı-aq onkologııalyq aýrýlarmen kúresý úshin keshendi jospar qabyldap, ǵylymı onkologııalyq ortalyq qurý kún tártibinde tur. BQO densaýlyq saqtaý salasy qyzmetkerleri de osyndaı maqsat-mindetter aıasynda jumystar atqarýy tıis.
Oblystyq densaýlyq saqtaý basqarmasynyń basshysy Qanat Tósekbaevtyń aıtýynsha, ótken jyly jalpy ólim-jitim deńgeıi tómendegenimen, jaraqattan, oqys oqıǵalar men ýlanýdan qaza bolǵandar sany artýda. Qaterli isik aýrýlaryn erte anyqtaý jumysy tıimsiz júrgizilýde, naýqastar kómekke syrqattaryn ábden asqyndyryp baryp júginedi.
2017 jyly oblysqa 86 jas maman kelse, sonyń 42-si aýdandarǵa jiberildi. Qazirgi kezde 207 maman jetispeıdi. Degenmen bul baǵytta naqty jumystar atqarylýda. Mysaly, ótken jyly jergilikti atqarýshy organdar esebinen M.Ospanov atyndaǵy Batys Qazaqstan memlekettik medıtsına ýnıversıteti men S.Asfendııarov atyndaǵy Qazaq ulttyq medıtsına ýnıversıtetinde 24 stýdentti oqytý úshin grant bólindi. Oblystyq densaýlyq saqtaý basqarmasy Almaty, Aqtóbe qalasyndaǵy medıtsınalyq JOO-larmen memorandýmǵa qol qoıdy.
Aýdandarda kelgen dárigerlerge qoldaý kórsetiledi. Al qaladaǵy jas mamandardyń kóbiniń óz úıi joq. Aımaq basshysynyń orynbasary Arman Óteǵulov bul máseleni qala ákimdigimen birlesip qolǵa alý qajettigin jetkizdi.
«Áleýmettik medıtsınalyq saqtandyrý qory» UAQ BQO boıynsha fılıalynyń dırektory Nurjamal Jumaǵulovanyń málim etkenindeı, qazirgi tańda ónim jetkizýshiler bazasynda 51 densaýlyq saqtaý nysany tirkelgen. Kepildendirilgen kólem boıynsha qyzmet kórsetýde jeke medıtsınalyq uıymdardyń belsendiligi arta túskenin atap ótýge bolady. Eger 2015 jyly olardyń sany úsheý bolsa, kúni búginge deıin 12 nysanmen kelisim jasaldy. Oblys boıynsha túsimder kólemi 900 mln teńgeden assa, emdeý oryndaryna 661632 adam tirkeldi. Mindetti áleýmettik medıtsınalyq saqtandyrý júıesine kóshýdiń mańyzy zor.
Jıyn barysynda basqa da kókeıkesti máseleler kóterilip, olardy sheshý jóninde tapsyrmalar berildi.
