Batys Qazaqstanda 200-ge jýyq bala koronavırýs juqtyrǵan
ORAL. QazAqparat – Batys Qazaqstan oblysynda qyrkúıek aıynan beri 197 bala koronavırýs juqtyrǵan, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmeti málim etkenindeı, sonyń ishinde qyrkúıek aıynda – 4, qazanda – 5, qarashada – 102, jeltoqsanda 71 baladan indet anyqtaldy.
Oǵan qosa 15 balabaqsha tárbıelenýshisiniń 12-sinen qarashada, úsheýinen jeltoqsanda koronavırýs tabylǵan.
Balalardyń bári de syrqatty otbasy múshelerinen juqtyrǵan.
BQO sanıtarlyq-epıdemıologııalyq baqylaý departamentiniń baspasóz qyzmetinen túsken málimetke qaraǵanda, óńirde ahýal qarasha aıynan beri turaqsyz bolyp otyr.
1-28 jeltoqsan aralyǵynda indet juqtyrǵandar sany 1042-ge jetti.
Jeltoqsan aıynda memlekettik shekaradan 28473 adam ótse, sonyń 4933-i – jolaýshylar. Anyqtamasy joq 842 jolaýshynyń tórteýinen kovıd tabyldy. Sol sekildi halyqaralyq júk tasymalymen aınalysatyn 14337 júrgizýshiniń 4833-inde anyqtama bolmaǵan. Bulardyń 9-ynyń indetke shaldyqqany belgili boldy.
Eske sala keteıik, budan buryn Oralda jańa jyl qarsańynda kóńil kóterý oryndarynda baqylaý kúsheıtilgenin, Qarashyǵanaq kenishinde bir aıda 82 adamnan koronavırýs tabylǵanyn jazǵan bolatynbyz.
