Batys Qazaqstanda 16 jasar oqýshy qyz ata-anasyna aıtpaı, kúıeýge «qashyp» ketken
ORAL. QazAqparat – Batys Qazaqstan oblysynda 16 jasar oqýshy qyz kúıeýge «qashyp ketken» jerinen keri qaıtaryldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa 28 qazan kúni Báıterek aýdanynda boldy.
Saǵat 21.00-de áıel qyzynyń joǵalyp ketkeni jóninde polıtsııaǵa júgingen. Onyń sózine qaraǵanda, qyzy shamamen saǵat 18.00-de mektepten belgisiz baǵytta shyǵyp ketken. Tolyq otbasynda tárbıelenetin ol buryn mundaı qylyqqa barmaǵan.
Dabyl boıynsha Báıterek aýdany polıtsııa bóliminiń jeke quramy aıaǵynan tik turdy. Sondaı-aq mektep ujymy, eriktiler jáne basqa turǵyndar qyzdy izdeýge jumyldyryldy.
Áleýmettik jelige monıtorıng jasaý kezinde polıtsııa qyzmetkerleri qyzdyń basyna oramal salǵan sýretin kórdi.
«Polıtsııa qyzmetkerleri qyzdyń jigitiniń úıine kelip, onyń keri qaıtýdan bas tartqanyna qaramastan, ata-anasynyń qolyna tapsyrdy. Kámeletke tolmaǵan qyzdy eshkim alyp qashpaǵan, «kúıeýiniń» úıine óz erkimen kelgen. Polıtseıler eki jaqtyń týysqandarymen túsinik jumystaryn júrgizdi. Qyzdyń ata-anasy men mektep dırektory polıtseılerge rızashylyǵyn bildirdi», dedi QazAqparat tilshisine B.Belgibekov.
