Batys Qazaqstanda 12 júkti áıel koronavırýstan emdelip jatyr
ORAL. QazAqparat – Batys Qazaqstan oblysynda 317 adam juqpaly aýrýlar statsıonarynda emdelip jatyr, dep habarlaıdy QazAqparat tilshisi.
BQO densaýlyq saqtaý basqarmasynyń basshysy Bolatbek Qaıýpovtyń brıfıngte málim etkenindeı, sonyń 8-i – balalar, 12-si – júkti áıelder.
Aýrýhanada jatqandardyń ishinde 26-sy jeńil, 261-i ortasha halde. 30-y aýyr halde. 16 eresek adam jasandy tynys alý apparatyna qosylǵan. 183 adamnyń pnevmonııamen aýyrǵany anyqtaldy.
Koronavırýsty emdeýge laıyqtalǵan qalalyq kópbeıindi aýrýhanada 130 emdelýshi jatyr.
Oblysta 800 adam jazylyp shyqsa, altaýy indetten kóz jumdy.
Senbi jáne jeksenbi kúnderi aýrýhanaǵa 62 adam tústi.
«Keıbir turǵyndardyń salǵyrttyǵy saldarynan aýrýdy otbasy múshelerine juqtyrýda. Sonymen qatar úıde ózdiginen emdelip, aýrýyn asqyndyryp alǵandar kóbeıip barady. Syrqattanǵandardyń 80 paıyzdaıy – pnevmonııaǵa shaldyqqandar. Ýaqyt ótkizip alǵan soń emdeý kúrdelene túsedi. Ásirese, jasy 65-ten asqan jandarǵa óte qıyn. Sondyqtan turǵyndardan sanıtarlyq talaptardy qatań saqtap, indetpen kúresip jatqan dárigerlerge kómektesýin ótinemiz», dedi B.Qaıýpov.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aıtýynsha, oblysta osy kezge deıin koronavırýs juqtyrǵan 1157 adam 552 oshaqta tirkeldi.
Óńirde 1 maýsymnan beri 487 adam aýyrsa, sonyń 43,9 paıyzy – buryn koronavırýs juqtyrǵandarmen baılanysta bolǵandar. Qalǵandary medıtsınalyq kómekke ózderi júgingen nemese profılaktıkalyq maqsatta jáne epıdemıologııalyq qadaǵalaý boıynsha synama alynǵan kezde anyqtalǵan. ıAǵnı syrttan kelgender joq.
Kúni búgin 40 adam provızorlyq, 191 adam karantındik statsıonarda jatsa, 344 adam úıden baqylanýda.
Aýyrǵandardyń 943-i Oral qalasynda tirkelse, aýdandarda da azaımaı otyr.
«Qazirgi tańda koronavırýstyń taralýyna tosqaýyl qoıý maqsatynda Terekti, Jánibek, Jańaqala jáne Qaratóbe aýdandarynda shekteý sharalary engizilgen», dedi N.Mustaev.
Eske sala keteıik, budan buryn dáriger Azamat Іzbasovtyń indetpen kúreste psıhologııalyq kómek kerek dep aıtqanyn jazǵan bolatynbyz.
