Batys Qazaqstanda 100 myńnan astam adam jer kezeginde tur
ORAL. QazAqparat – Batys Qazaqstan oblysynda jeke turǵyn úı salý úshin jer telimin alýǵa 104191 adam kezekte tur, dep habarlaıdy QazAqparat tilshisi.
BQO jer qatynastary basqarmasynyń basshysy Murat Ómirálıevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń 72437-si Oral qalasynyń úlesine tıedi.
Onyń aıtýynsha, 2019 jyly jeke turǵyn úı qurylysy úshin oblys aýdandarynda 1502, bıyl 366 jer telimi berildi.
Kúni búgin oblys boıynsha «Nurly jer» baǵdarlamasy aıasynda 572 jer telimin (363-i – Bórli, 209-y Báıterek aýdanynda) berý josparlanýda.
«2017 jyly «Nurly jer» baǵdarlamasy aıasynda Oralǵa qarasty Krýgloozernyı kenti aýmaǵynda 1141 jer telimine egjeı-tegjeıli jobalaý jospary daıyndalyp, bekitildi. Qazirgi kezde atalǵan jer telimderin sýmen jabdyqtaý jumystary júrgizilýde. Qajetti ınjenerlik jelilermen qamtamasyz etilgennen keıin jer telimderi kezekke sáıkes beriletin bolady. Sonymen qatar tıisti jumystar aıaqtalǵannan keıin Qaratóbe aýdanynda 144, Terektide 528 jer telimi ıelerine tabys etiledi», dedi M.Ómirálıev.
