Batys Qazaqstanda 100 myńǵa jýyq adam koronavırýsqa qarsy egildi
ORAL. QazAqparat – Batys Qazaqstan oblysynda 99532 adam koronavırýsqa qarsy vaktsınanyń birinshi komponentimen egildi, dep habarlaıdy QazAqparat tilshisi.
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń 74715-i «Spýtnık V», 1634-i «QazVac», 21540-y «Hayat-Vax», 1643-i «CoronaVac» vaktsınasyn qabyldady.
Ekinshi komponentpen 65338 adam egildi.
Gúlnár Maqsotqyzynyń sózine qaraǵanda, osy kezge deıin oblysqa 269100 doza (140500-i birinshi, 128600-i ekinshi komponent) vaktsına kelip tústi. Sonyń ishinde 136560-y (105550-i – І, 93550-i – ІІ komponent) – Reseıde óndirilgen «Spýtnık V» vaktsınasy. Birinshi jáne ekinshi komponentti egý aralyǵyndaǵy ýaqyt 45 kúndi quraıdy, qaýlyǵa sáıkes azamattardyń ótinishi negizinde 21 kúnnen 90 kúnge deıin.
Sondaı-aq 4 myńy (2 myńy – І, 2 myńy – ІІ komponent) – otandyq «QAZVAS» vaktsınasy. Mundaǵy aralyq – 21 kún.
Elý myńy (jartysy – І, jartysy – ІІ komponent) – Birikken Arab Ámirlikterinde óndirilgen «Hayat-Vax» vaktsınasy. Ekinshi komponentti 14-28 kún ótkennen keıin jasaıdy.
16 myńy (8 myńy – І, qalǵany – ІІ komponent) Qytaıda óndirilgen «CoronaVac» vaktsınasy. Mundaǵy aralyq – 14-28 kún.
«Qazirgi tańda halyqty indetten qorǵaýdyń jalǵyz ári tıimdi joly vaktsınatsııa ekendigin ómir kórsetip otyr. Dúnıejúzilik densaýlyq saqtaý uıymynyń usynymy boıynsha ujymdyq ımmýnıtet qalyptastyrý úshin halyqtyń 60 paıyzdan kem emes bóligi vaktsınalanýy tıis. Vaktsına belgili bir aýrýǵa qatysty arnaıy ımmýnıtettiń qalyptasýyna yqpal etedi. Ekpe alǵan adam aýyrmaıdy. Syrqattanǵan kúnniń ózinde aýrý jeńil ótedi», dedi G.Ábdirahmanova.
Eske sala keteıik, budan buryn Batys Qazaqstanda koronavırýs juqtyrǵandar sany óskenin jazǵan edik.
