Batys Qazaqstanda 100-den astam pedagog koronavırýsqa qarsy ekpe aldy
ORAL. QazAqparat – Batys Qazaqstan oblysynda 100-den astam pedagog koronavırýsqa qarsy ekpe aldy, dep habarlaıdy QazAqparat tilshisi.
BQO densaýlyq saqtaý basqarmasynyń basshysy mindetin atqarýshy Arman Qalıbekovtiń óńirlik kommýnıkatsııalar qyzmeti alańynda málim etkenindeı, óńirge 4 naýryz kúni 6500 doza mólsherinde Gam-KOVID-Vak (Sputnik V) vaktsınasy jetkizilgen (І komponent – 3250 doza, ІІ komponent – 3250 doza) bolatyn.
Arman Talǵatulynyń sózine qaraǵanda, kúni búgin osy lekten (3250 doza) 560 adam ekpe aldy. Sonyń ishinde 102-si – pedagogtar, jeteýi – quqyq qorǵaý organdarynyń ókilderi.
Vaktsınatsııa keste boıynsha júrgizilýde. Birinshi kezekte aldyńǵy topqa ilikpeı qalǵan, indet juqtyrý qaýpi joǵary medıkter, sodan keıin muǵalimder men kúshtik qurylymdar qyzmetkerleri egilýde.
Oǵan qosa QR bas memlekettik sanıtarlyq dárigeriniń 2021 jylǵy 16 aqpandaǵy qaýlysyna sáıkes ózgerister engizilip, 65 jastan asqan adamdarǵa vaktsına jasaýǵa ruqsat etildi.
Bastapqy kezeńde 1 myń medıtsına qyzmetkerine vaktsınanyń І jáne ІІ komponentteri tolyqtaı egilgen bolatyn.
Oblysta koronavırýs juqtyrý qaýpi seıilgen joq. Osy kezge deıin barlyǵy 13667 adam indet juqtyrsa, sonyń 11308-i nemese 82,7 paıyzy jazylyp shyqty. 216 adam indetten kóz jumdy.
«Qazirgi tańda 195 tósektik 4 karantındik statsıonarda 108 naýqas jatyr. Al 591 tósektik 7 ınfektsııalyq statsıonarda 278 adam emdelýde. Jansaqtaý bólimshesindegi 17 naýqastyń úsheýi – 30 ben 60, 10-y 60-80 jas aralyǵyndaǵylar bolsa, tórteýi – seksennen asqandar. 14 naýqastyń 12-si qosymsha júrek-qan tamyrlary aýrýlary, ekeýi qant dıabetine shaldyqqan. Kúni búgin ınvazıvti jasandy tynys alý apparatyna 1, ınvazıvti emes apparatqa 10, ottegi kontsentratoryna 4, ortalyqtandyrylǵan ottegi kózine 67 naýqas qosylǵan», dedi A.Qalıbekov.
Eske sala keteıik, budan buryn BQO-da naýryzda 500-ge jýyq adamnan koronavırýs anyqtalǵanyn jazǵan bolatynbyz.
