Batys Qazaqstanda 10 jańa bilim oshaǵy boı kóterýde
ORAL. QazAqparat - Búgin oblys ákimi Altaı Kólginov Oral qalasyndaǵy fızıka-matematıkalyq baǵyttaǵy Nazarbaev zııatkerlik mektebindegi alǵashqy qońyraý saltanatyna qatysyp, ustazdar men shákirtterdi merekemen quttyqtady, dep habarlaıdy «QazAqparat» tilshisi.
«Memleket basshysy Nursultan Ábishuly Nazarbaev bilimge erekshe kóńil bólip keledi. Sondyqtan jyl saıyn mektepterde jańǵyrtý jumystary júrip jatyr. Oǵan qosa muǵalimderimiz qaıta daıarlaýdan ótkizilýde. Bolashaqta úlken maman bolatyn shákirtter osy bastan olımpıadalarǵa qatysyp, bilimderin shyńdaýda, osy zamanǵa saı mamandyqtarǵa daıarlyq jumystary júrýde. Qazir - jańa tehnologııalardyń zamany. Kúnnen kúnge jańalyqtar paıda bolýda, biz sodan qalmaýymyz kerek. ol úshin oqý kerek, eńbek etý kerek, sonda bizdiń memleketimiz aldyńǵy shepte bolady. Bul rette óskeleń urpaqqa úlken senim artamyz. Sizder úshin muǵalimderińiz aıanbaı eńbek etip, ata-analaryńyz, memleket barlyq jaǵdaıdy jasaýda. Tek bıyldyń ózinde óńirde 10 bilim oshaǵy jańadan salynyp jatyr, onyń 8-i - jańa mektep, tórteýi Oral qalasynda. Apatty mektepter joıylyp, úsh aýysymdy mektepterdi boldyrmaý úshin jańa mektepter boı kóterýde. Bilim ordalary kompıýter, materıaldyq-tehnıkalyq jabdyqtarmen tolyq qamtamasyz etilgen. Sondyqtan shákirtter memlekettiń úmitin aqtaıdy dep senemiz», - dedi óńir basshysy.
Atalmysh mektep dırektory Sholpan Qadyrovanyń aıtýynsha, jańa oqý jylynda mektepte 586 oqýshy bilim alady, onyń 80-i - 7-synypqa jańadan qabyldanǵan oqýshylar. Sondaı-aq ustazdar qatary da artyp, osy oqý jylynda 16 muǵalim jumysqa qabyldanǵan. Olardyń arasynda «Bolashaq» baǵdarlamasynyń, Nazarbaev ýnıversıtetiniń túlekteri, bilim magıstrleri bar. Mektep oqýshylarynyń jaz mezgilindegi erekshe jeńisi - respýblıkalyq robototehnıka olımpıadasynda úzdik atanýy. Oraldyq zııatkerler bul saıystaǵy 7 atalymnyń 5-ýinen júldeli oryn aldy. Osy jyldyń qarasha aıynda jeńimpazdar Kosta-Rıkadaǵy halyqaralyq olımpıadada el namysyn qorǵamaq. Bıylǵy oqý jylynan bastap elimizdegi barlyq mektepterdegi 2, 5, 7-synyptarda jańartylǵan mazmundaǵy bilim berý baǵdarlamasymen oqytý bastalady. Osy oraıda Nazarbaev mektepteri bilimdegi jańa tehnologııalar, ádis-tásilder boıynsha óz tájirıbelerin belsendi taratyp keledi. Tek tamyz aıynda 1 600-den astam muǵalim mektepke kelip, jańa mazmun boıynsha biliktilik arttyrýǵa arnalǵan sheberlik synybynan ótken.
Shara mektep oqýshylarynyń merekelik kontsertimen jalǵasty. Oqýshylar óz ónerlerine Elbasy N.Nazarbaevtyń «Bolashaqqa baǵdar: rýhanı jańǵyrý» maqalasyn arqaý etken. Olar tarıh pen búgindi, bolashaqty baılanystyryp, zamanaýı tehnologııalar men múmkindikterdi ashyp kórsetti.
Osy jyldyń alǵashqy qońyraýyn mektepke túsý kezinde 1 000 baldyń 921-in jınap, bilimimen erekshelengen 7-synyp oqýshysy Dara Baıanǵalıeva soqty.
Aıta keteıik, oblystyq bilim basqarmasynan túsken málimetke qaraǵanda, jańa oqý jylynda óńirdegi 381 mektepte 94 myńnan astam, sonyń ishinde 11 802 oqýshy 1-synypta bilim almaq.
Bıyl jergilikti bıýdjetten mektep oqýlyqtaryn satyp alý úshin 2 334,9 mln teńge bólindi. Jańartylǵan bilim mazmunyna kóshýge baılanysty 2, 5, 7 synyptardyń barlyq oqýlyqtary, mektepaldy daıarlyq, arnaýly mektep oqýlyqtaryna, aǵylshyn tilinde jaratylystaný baǵytyndaǵy oqýlyqtar jáne qordy tolyqtyrý baǵytynda, barlyǵy 1 244 000-nan astam dana oqýlyq pen oqý-ádistemelik keshenderge tapsyrys berildi. Oblysta jańadan boı kóterip jatqan mektepterden basqa 12 bilim berý nysanyna jergilikti bıýdjet esebinen jalpy somasy 1 241 mln teńgege kúrdeli jóndeý jumystary júrgizildi.
