Batys Qazaqstanda 10 tonnadaı júk tıelgen avtokólik órtenip ketti
ORAL. QazAqparat – Batys Qazaqstan oblysynda 10 tonnadaı júk tıelgen avtokólik órtenip ketti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 13 sáýir kúni Aqjaıyq aýdany Іlbishin aýyly mańynda boldy.
Saǵat 12.50-de Oral-Atyraý jolynyń 175-shaqyrymynda Mercedes Benz júk kóliginiń janyp jatqany jóninde habar tústi. Shamamen 10 tonnadaı qurylys materıaldary (tusqaǵazdar) tıelgen kólik Ýkraınadan Tájikstanǵa bet alǵan. Kólik Ózbekstannyń «Sergorus» qoǵamdyq birlestik uıymyna tıesili. Júktiń ıesi anyqtalyp jatyr.
№10 órt sóndirý bólimshesi qyzmetkerleriniń kúshimen (4 adam, 1 tehnıka) saǵat 15.04-te órt oqshaýlanyp, 15.52-de tolyq sóndirildi.
Eske sala keteıik, budan buryn Batys Qazaqstanda 2,5 tonna balyq tıep kele jatqan avtokólik ustaldy.
