Batys Qazaqstanda 10 mekteptiń qurylysy uzaqqa sozylyp ketti
BQO ákiminiń orynbasary Baqytjan Narymbetovtiń aıtýynsha, mundaǵy basty sebep – merdigerlerdiń jumysty uıymdastyra almaýy, mindettemelerine degen jaýapsyzdyǵy.
Onyń sózine qaraǵanda, jarty jylda aıaqtalýy tıis kúrdeli jóndeý jumystary 1,5 jylǵa, keıbir bilim oshaqtarynyń qurylysy 4 jylǵa sozylyp ketti. Soǵan baılanysty bıyl osy máseleni sheshý úshin Batys Qazaqstan oblysynyń ákimi Narıman Tóreǵalıev quzyrly memlekettik organdarmen jumys tobyn quryp, tikeleı óz baqylaýyna aldy.
Sonyń ishinde ekinshi jartyjyldyqta Kaztalov aýdanyndaǵy úsh problemalyq mektep máselesin sheshý josparlanǵan bolatyn. 2020 jyly qurylysy bastaý alǵan Kaztalov aýdany Juldyz aýylyndaǵy 108 orynǵa arnalǵan mekteptiń burynǵy merdigeri sottyń sheshimimen jozyqsyz dep tanyldy. Qurylysty aıaqtaý úshin qaıta konkýrs ótkizilip, jańa merdiger anyqtalyp, mektep 23 tamyzda saltanatty túrde ashyldy.
Kaztalov aýylynda 600 orynǵa arnalǵan mekteptiń qurylysy 2020 jyly bastaldy. Ol pandemııa kezeńine tap kelip, osyǵan baılanysty merdiger kompanııada jumys kúshterin uıymdastyrý men qarjylyq qıyndyqtar týyndady. Qazir baqylaý kúsheıtilip, mektepti paıdalanýǵa berý bıyl 1 qarashaǵa josparlandy.
Qaratóbe aýdanynda 2022 jyly sý tasqynynan zardap shekken Shalǵyn aýylynda 60 oryndyq mektep qurylysy bastaldy. Bıyl mindettemesin oryndaı almaǵan merdigermen kelisimshart buzyldy. Konkýrs jarııalanyp, jańa merdiger anyqtaldy. Bul oqý orny jyl sońyna deıin iske qosylmaq.
Ákim orynbasarynyń málimdeýinshe, Oral qalasynda 400 orynǵa arnalǵan №31 mekteptiń qurylysyn jeke ınvestor 2020 jyly bastaǵan edi. Áıtse de jobaǵa túzetýler engizý, jer teliminiń sáıkessizdigi sekildi túrli sebeptermen mektep qurylysynyń merzimi 3 jyl boıy sozylyp keledi. Oblys ákimi Narıman Tóreǵalıevtiń tikeleı aralasýymen atalǵan mekteptiń jer telimi memleketke qaıtaryldy. Qazir oblystyq qurylys basqarmasymen nysan qurylysyn bastaý maqsatynda bilim berý ınfraqurylymyn qoldaý qorynyń esebinen jobany qarjylandyrýǵa bıýdjettik ótinim joldandy.
Sol sekildi Bókeı ordasy aýdany Han ordasy aýylynda Jáńgir han atyndaǵy mektepti kúrdeli jóndeýge 2022 jyly qarajat bólinip, memlekettik satyp alý rásimderi ótkizilip, merdiger anyqtalǵan bolatyn. Alaıda jyl sońyna deıin jóndeý jumystary aıaqtalmady. Bul merdiger de memlekettik satyp alýdyń josyqsyz qatysýshysy dep tanyldy. Degenmen jóndeý jumystary jalǵastyrylyp, jergilikti atqarýshy organnyń baqylaýyna alynyp, jańa 2023 oqý jyly qarsańynda mektep ashylady.
Kaztalov mektep-lıtseıiniń ǵımaratyn kúrdeli jóndeýge 2022 jyly qarajat bólinip, memlekettik satyp alý rásimderi ótkizildi. Tapsyrys berýshi merdigerdi memlekettik satyp alýǵa josyqsyz qatysýshy dep taný týraly sotqa talap aryz berdi. Aldyn ala áńgimelesý barysynda sot obektini aıaqtaý boıynsha bitimgershilik kelisimge kelýdi usyndy. 2023 jyldyń aqpanynda tapsyrys berýshi men merdiger arasynda bitimgershilik kelisim jasalyp, jumystar jalǵasty. Mektep bıylǵy 1 qyrkúıekte ashylmaq.
Taǵy bir túıtkildi másele, Oral qalasynda daryndy balalarǵa arnalǵan №8 oblystyq mamandandyrylǵan mektep-lıtseıin kúrdeli jóndeý 2021 jyly bastalǵan bolatyn. Óndiristik jumys kestesiniń buzylýyna baılanysty sotqa shaǵym túsirgen tapsyrys berýshi sot sheshimi negizinde merdigermen shartty buzyp, josyqsyz qatysýshylar tizimine endi. Bul bilim ordasyndaǵy oqý úrdisi 2023 jyldyń 1 qyrkúıeginen bastap Oral qalasynyń ortalyǵynda ornalasqan burynǵy estetıkalyq baǵyttaǵy gımnazııa ǵımaratynda yńǵaılastyrylyp, uıymdastyrylyp jatyr. Nysandaǵy jumystardyń toqtap turǵanyna 6 aıdan astam ýaqyt ótýine baılanysty tapsyrys berýshimen zańǵa sáıkes qaıtadan tehnıkalyq tekserý júrgizýge sharalar qabyldanyp, qurylys-montajdaý jumystaryn jalǵastyrý úshin qorytyndynyń nátıjesin kútip otyr.
Aqjaıyq aýdany Bazartóbe kentindegi mektep ǵımaratyn kúrdeli jóndeýge 2022 jyly qarajat bólinip, memlekettik satyp alý rásimderi ótkizilip, tamyzda bastalyp, jeltoqsan aıynda aıaqtalýy tıis bolatyn. Kelisimsharttaǵy merzimderdi saqtamaǵan merdigermen shart buzylyp, josyqsyz qatysýshy dep tanyldy. Degenmen merdigerge 2023 jyldyń qarasha aıyna deıin kúrdeli jóndeý jumystaryn aıaqtaý boıynsha tapsyrma berildi.
Dál osyndaı jaǵdaı 2022 jyldan sozylyp kele jatqan Báıterek aýdanynyń Chývashın jáne Razdolnyı mektepteriniń kúrdeli jóndelýinde de kórinis taýyp otyr. Merdigerdiń jaýapkershiliginiń tómendiginen jóndeý jumystary uzaqqa sozylyp, sot protsesterimen jalǵasty. Atalǵan mektepterdegi kúrdeli jóndeý jumysyn jańa oqý jylynyń ekinshi toqsanynda aıaqtaý josparlanyp otyr.
Atalǵan №8 oblystyq mamandandyrylǵan mektep-lıtseıi, Kaztalov mektep-lıtseıi, Aqjaıyq aýdany Bazartóbe kentindegi, Báıterek aýdanynyń Chývashın jáne Razdolnyı aýylyndaǵy mektepterdi kúrdeli jóndeý jumystary boıynsha memlekettik satyp alý júıesi aıasynda anyqtalǵan merdiger – «Gradstroıservıs» kompanııasy.
«Aıta keteıin, oblys boıynsha barlyq qarjylandyrý kózderinen 23 mekteptiń qurylysyna qarajat bólindi. Onyń ishinde bıýdjet qarajaty esebinen 8 mekteptiń qurylysy júrgizilip jatsa, 15-i oblystyń 7 aýdanynda «QPO b.v.» kompanııasynyń áleýmettik mindettemeleri aıasynda salynyp jatyr.
Bul mektepterdiń 17-sin osy jyldyń sońyna deıin paıdalanýǵa berý josparlanyp otyr. Sonymen qatar «Jaıly mektep» ulttyq jobasy aıasynda oblys boıynsha 16 200 oryndyq 18 mekteptiń qurylysy 2023-2025 jyldarǵa josparlanǵan. Sonyń ishinde 9 mekteptiń qurylysyn osy jyly bastap 2024 jyly aıaqtaý, qalǵan 9-ynyń qurylysyn 2024 jyly bastap 2025 jyly aıaqtaý kózdelgen. Búginde 8 mekteptiń qurylysyna merdigerler anyqtalyp, beseýi boıynsha jumys bastaldy», - dedi B.Narymbetov.
Eske sala keteıik, budan buryn Batys Qazaqstan oblysynda 94 muǵalimniń jetispeıtinin jazǵan bolatynbyz.
