Batys Qazaqstanda 1 jasar balany avtobýs basyp ketti
ORAL. QazAqparat - 3 mamyr kúni saǵat 16.30 shamasynda Qaratóbe aýdany Egindikól aýylynda qaıǵyly oqıǵa oryn aldy, dep habarlaıdy «QazAqparat» tilshisi.
Atalmysh aýyldyq okrýg ákimi Abat Zeınýllınniń sózine qaraǵanda, jolaýshy tasymaldaıtyn avtobýs jas jarym shamasyndaǵy qyz balany basyp ketip, ol oqıǵa ornynda kóz jumǵan. Sol kúni qaladan jolaýshy tasymaldap kelgen kólik ıesine aýyl turǵyny jolaqysyn tólep turyp, ózinen buryn sábıiniń túsip ketkenin ańdamaı qalǵan. Anasynan buryn kólikten túsken qyz bala avtokóliktiń astyna kirip ketip, ol qozǵalǵan kezde qaıǵyly oqıǵa oryn alǵan.
Qazirgi kezde tergeý amaldary júrgizilýde.
4 mamyr kúni aýdan ákimi Ashat Shaharov osy oqıǵaǵa baılanysty tıisti bólimder basshylary men barlyq aýyldyq okrýg ákimderin jınap, shuǵyl otyrys ótkizdi. Onda jol erejesin saqtaý, balalardy qaraýsyz qaldyrmaý, ata-analar arasynda túsinik jumystaryn júrgizý qajettigi aıtyldy.
