Batys Qazaqstanda 1,5 myńnan astam adam úı karantıninde jatyr
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkendeı, qazirgi ýaqytta sondaı-aq 5 adam - provızorlyq, 119 adam - karantındik statsıonarda jatyr.
Oblystyq juqpaly aýrýlar aýrýhanasynda 168 adam em alýda. Al 155-i jazylyp shyqty.
Óńirde sońǵy tirkelgen 13 naýqastyń 8-i – buryn aýyrǵandarmen qarym-qatynasta bolǵandar, sonyń ishinde bireýi – medıtsına qyzmetkeri.
Sondaı-aq Atyraý oblysyndaǵy Teńiz ken ornynan kelgen eki adamnan koronavırýs anyqtaldy. Onyń bireýi test nátıjesi teris qorytyndy kórsetýine baılanysty úı oqshaýlaýynda bolǵan. Alaıda keıin dene qyzýy kóterilip, jedel járdemmen provızorlyq statsıonarǵa jetkizilip, zerthanalyq synama alynǵan kezde onyń da aýrý juqtyrǵany anyqtaldy.
Taǵy úsh adam – Reseıden kelgen Shymkent qalasy men Batys Qazaqstan oblysynyń turǵyndary. Olar Reseımen shektesetin «Syrym» jáne «Tasqala» avtobeketterinen ótkennen keıin jedel járdemmen karantındik statsıonarǵa jatqyzylǵan.
COVID-19 dıagnozy rastalǵannan keıin 13 naýqas ta oblystyq juqpaly aýrýlar aýrýhanasyna ornalastyryldy.
Oblysta indetke qarsy kúres sharalary jalǵasýda.
Eske sala keteıik, budan buryn BQO-da Teńiz ken orny men Reseıden kelgen 10 adamnan koronavırýs anyqtalǵanyn jazǵan bolatynbyz.