Batys Qazaqstanda 1,5 myńǵa jýyq medıtsına qyzmetkeri 192 mln teńge ústemeaqy aldy
ORAL. QazAqparat – Batys Qazaqstan oblysynda koronavırýspen kúres sharalaryna tartylǵan 1494 medıtsına qyzmetkeri 192 mln teńge ústemeaqy aldy, dep habarlaıdy QazAqparat tilshisi.
BQO densaýlyq saqtaý basqarmasy ekonomıkalyq josparlaý bóliminiń basshysy Asylbek Qanalıevtiń aıtýynsha, atalmysh shara QR Prezıdenti Qasym-Jomart Toqaevtyń tapsyrmasyna sáıkes júzege asyrylýda.
QR Densaýlyq saqtaý mınıstrliginiń bıylǵy 4 sáýirdegi №KR-DSM 28/2020 buıryǵyna sáıkes óńirde koronavırýs juqpasyna qarsy kúres sharalaryna tartylǵan medıtsına
qyzmetkerlerin qarjylaı qoldaýdy uıymdastyrý maqsatynda oblys ákiminiń orynbasary Bıbigúl Qonysbaeva tóraǵalyq etetin komıssııa qurylǵan bolatyn.
Atalǵan komıssııa quramyna «Nur Otan» partııasy, medıtsına qyzmetkerleri kásipodaǵy, oblystyq jumyspen qamtýdy úılestirý jáne áleýmettik baǵdarlamalar basqarmasy, áleýmettik medıtsınalyq saqtandyrý qory fılıalynyń ókilderi engizildi.
Komıssııa sheshimimen naýryz aıy úshin medıtsına qyzmetkerleriniń naqty atqarǵan ýaqyty úshin 22,7 mln teńge tólendi. Sonyń ishinde qaýiptiligine qaraı birinshi
topqa kiretin 23 qyzmetker 2,2 mln teńge, ekinshi toptaǵy 101 qyzmetker 14,7 mln teńge, úshinshi sanattaǵy 91 qyzmetker 5,8 mln teńge aldy.
Óńirde koronavırýs alǵash ret 29 naýryz kúni tirkelgendikten, atalǵan buıryqqa sáıkes juqpaly aýrýlar aýrýhanasy, provızorlyq jáne karantındik statsıonar,
sondaı-aq jedel járdem qyzmetkerleri men statsıonarlarǵa naýqastardy tasymaldaǵan brıgadalarǵa naqty atqarǵan ýaqyty úshin ústemeaqy belgilendi.
Sáýir aıy úshin 167,2 mln teńge, sonyń ishinde birinshi toptaǵy 95 qyzmetkerge 33,9 mln teńge, ekinshi toptaǵy 298 qyzmetker 58,5 mln, úshinshi toptaǵy 826 qyzmetker 74,8 mln teńge ústemeaqy aldy.
Sondaı-aq naýryz aıy úshin qosymsha 2,5 mln teńge, sonyń ishinde ekinshi toptaǵy 26 qyzmetkerge 866 myń teńge, úshinshi toptaǵy 34 adamǵa 1183,5 myń teńge tólendi.
«Mamyr aıy úshin ústemeaqy tóleý máselesin komıssııa maýsymnyń basynda bas qosyp, qarastyryp, sheshetin bolady», dedi QazAqparat tilshisine A.Qanalıev.
Eske sala keteıik, budan buryn BQO-da 215 medıtsına qyzmetkerine 22,6 mln teńge ústemeaqy tólengenin, Reseıden kelgen jambyldyq jumysshydan koronavırýs
tabylǵanyn jazǵan bolatynbyz.
