Batys Qazaqstan joǵary medıtsınalyq kolledjiniń 100 jyldyǵy atalyp ótildi
ORAL. QazAqparat - Batys Qazaqstan joǵary medıtsınalyq kolledjinde osy oqý ornynyń 100 jyldyǵyna oraı «Qazaqstan Respýblıkasynda «Densaýlyq» memlekettik baǵdarlamasyn júzege asyrý aıasynda meıirbıkeliń bilim berýdi jańartý» taqyrybynda halyqaralyq ǵylymı-tájirıbelik konferentsııa ótkizildi.
Qazaqstan men Reseıdiń medıtsınalyq oqý oryndarynyń ókilderi, densaýlyq saqtaý salasynyń qyzmetkerleri qatysqan jıynda oblystyq densaýlyq saqtaý basqarmasynyń basshysy Qamıdolla Irmenov Batys Qazaqstan joǵary medıtsınalyq kolledjiniń bir ǵasyr ishinde kóptegen tabystarǵa qol jetkizgenin atap ótti. QR Densaýlyq saqtaý jáne áleýmettik damý mınıstrligi Ǵylym jáne adamı resýrstar departamenti medıtsınalyq bilim jáne ǵylym basqarmasynyń basshysy Úlmıra Nuralıeva jyly lebizin arnaýmen birge kún tártibindegi taqyrypqa baılanysty baıandama jasasa, QR Densaýlyq saqtaý jáne áleýmettik damý mınıstrligi meıirgerler isi boıynsha shtattan tys bas mamany, «Qazaqstan Respýblıkasy medıtsınalyq kolledjderi odaǵy» zańdy tulǵalar birlestiginiń tóraǵasy, medıtsına ǵylymynyń doktory Sultan Seıdýmanov ta kolledj ujymyn ǵasyrlyq toıymen quttyqtady. Sondaı-aq Reseı Federatsııasy «Samara memlekettik medıtsınalyq ýnıversıteti» meıirgerlik bilim berý ınstıtýtynyń dırektory, medıtsına ǵylymynyń doktory,professor Larısa Karaseva, N.Lıapına atyndaǵy Samara medıtsınalyq kolledjiniń dırektoryNadejda ıArochkına, Aqtóbe oblysynyń meıirbıke isin damytý ortalyǵy dırektorynyń orynbasaryZamzııa Alıpova jáne basqalar sóz alyp, tájirıbe, oı-pikirlerimen bólisti.
2016-2020 jyldarǵa arnalǵan «Densaýlyq» baǵdarlamasyna sáıkes jańa talaptar qoıylyp, Batys Qazaqstan medıtsınalyq kolledjiniń Batys Qazaqstan joǵary medıtsınalyq kolledjine aınalǵany atalyp ótildi.
Konferentsııadan keıin oblystyq qazaq drama teatrynda ótken saltanatty jıynda Batys Qazaqstan joǵary medıtsına kolledjiniń ujymyn mereıtoıymen óńir basshysynyń atynan oblys ákiminiń birinshi orynbasary Arman Óteǵulov quttyqtap, bir top qyzmetkerge oblys ákiminiń alǵyshatyn tabys etti. Jıyn barysynda sondaı-aq ozat qyzmetkerlerge QR Densaýlyq saqtaý jáne áleýmettik damý mınıstrliginiń «Densaýlyq saqtaý isiniń úzdigi» tósbelgisi men qurmet gramotalary, basqa da marapattar tapsyryldy.
Batys Qazaqstan joǵary medıtsınalyq kolledjiniń dırektory Nurjan Shombalovtyń aıtýynsha, kolledj elimizdegi eń alǵashqy medıtsınalyq oqý orny bolyp tabylady. Oral qalasynda feldsherler men feldsher-akýsherlerdi daıarlaıtyn feldsherlik-akýsherlik mektep 1916 jyly 1 qarashada ashyldy. Budan keıin 12-15 jyldan soń ǵana Qazaqstanda basqa medıtsınalyq oqý oryndary ashyla bastady. 1923 jyly atalǵan mektep Qazaq ólkelik medıtsınalyq tehnıkýmy retinde sol kezdegi el astanasy Orynborǵa aýystyryldy. 1929 jyly astana Qyzylordaǵa aýystyrylǵannan keıin tehnıkým Oralǵa qaıta oraldy.
Qazirgi tańda kolledj - elimizdiń jetekshi medıtsınalyq kolledjderiniń biri. Alty mamandyq jáne 8 biliktilik boıynsha medıtsınalyq qyzmetkerlerdiń joǵary bilikti jáne quzyretti kadrlaryn daıyndaıtyn Qazaqstan Respýblıkasy Densaýlyq saqtaý mınıstrliginiń bazalyq oqý orny bolyp tabylady. Búginde kolledjde 1050 stýdent bilim alýda.
2014 jyly Batys Qazaqstan medıtsınalyq kolledji Qazaqstan Respýblıkasynyń úzdik alty medıtsınalyq kolledji qatarynda meıirbıke isi mamandyǵy boıynsha qoldanbaly bakalavrıattyń bilim berý baǵdarlamasyn engizýdiń DSM synamaly jobasyn iske asyrýǵa qosyldy. Bul joba «Qazaqstan Respýblıkasynyń densaýlyq saqtaý salasy sektoryndaǵy tehnologııalardy berý jáne ınstıtýtsıonaldyq reforma júrgizý» Dúnıejúzilik bank jobasy aıasynda daıyndalyp, engizilýde.
Kolledj pedagogtarynyń kópshiligi joǵary jáne birinshi sanatqa ıe. Almaty, Astana, Túrkııa, Reseı, Fınlıandııa, Ispanııa, AQSh, Germanııada oqýdan, tájirıbeden ótken. Jyl saıyn oqytýshylardyń 96 paıyzyna jýyǵy óz biliktilikterin arttyrady. Kolledj túlekteri elimiz óńirlerinde tabysty eńbek etýde, olardyń 92-93 paıyzy jyl saıyn mamandyǵy boıynsha qyzmetke ornalasady, qalǵandary JOO-larǵa túsedi.
