Batys Qazaqstan turǵyndaryna tapsyrǵan qarýlary úshin 8 mln teńge tólendi
ORAL. QazAqparat - Oblys aýmaǵynda bıylǵy 10 sáýirden beri turǵyndardan zańsyz saqtalyp otyrǵan qarý-jaraq, oq-dáriler men jarylǵysh zattardy satyp alý sharasy júrgizilýde, dep habarlaıdy «QazAqparat» tilshisi.
BQO ІІD baspasóz qyzmetinen túsken málimetke qaraǵanda, jyl basynan beri azamattardan 140 ótinish túsip, 160 dana qarý tapsyryldy. Sonyń 14-i uzyn uńǵyly, úsheýi qysqa uńǵyly, 135-i tegis uńǵyly, 8-i travmatıkalyq qarý bolsa, 1175 - oq-dári, bireýi - artıllerııalyq snarıad.
Komıssııa qarý-jaraqty jalpy somasy 8 mln 034 myń teńgege satyp alý jóninde 140 sheshim qabyldady. Qarjy tolyqtaı tólendi.
Eske sala keteıik, respýblıkalyq bıýdjetten osy maqsatqa 8 mln 034 myń teńge bólingen bolatyn.
