Batys Qazaqstan oblysynyń úsh aýdanynda ákimder saılanady

ORAL. QazAqparat – Batys Qazaqstan oblysynyń Bókeı ordasy, Qaratóbe jáne Tasqala aýdandarynda ákimder saılanady. Bul týraly BQO máslıhatynyń kezekten tys ótkizilgen altynshy sessııasynda málim boldy, dep habarlaıdy QazAqparat tilshisi.

Oblys ákimi Narıman Tóreǵalıev, BQO máslıhatynyń tóraǵasy Murat Muqaev, BQO aýmaqtyq saılaý komıssııasynyń tóraǵasy Ǵaısa Qapaqov qatysqan sessııanyń kún tártibinde aýdandar, oblystyq mańyzy bar qalalar ákimderin saılaý jónindegi pılottyq aımaqtardyń tizimi jáne pılottyq aımaqtardyń ákimderiniń saılaýyn ótkizý kúni týraly másele qaraldy.

Sessııada atalyp ótilgenindeı, Memleket basshysynyń bastamasymen aýdandar men oblystyq mańyzy bar qalalar ákimderin tikeleı saılaý azamattardyń konstıtýtsııalyq quqyqtaryn tolyqqandy iske asyrýdaǵy belsendiligin arttyrýǵa, halyqtyń bılikke degen senimin jáne ákimniń halyq aldynda esep berýin kúsheıtýge, «Halyq únine qulaq asatyn memleket» tujyrymdamasyn iske asyrýǵa múmkindik beretini sózsiz.

QR Prezıdenti Qasym-Jomart Toqaev VIII shaqyrylymdaǵy QR Parlamentiniń birinshi sessııasynyń ashylýynda bıyl elimizde tuńǵysh ret 45 aýdan jáne oblystyq mańyzy bar qala ákimderiniń saılaýy ótetinin málimdegen bolatyn. Sonyń úsheýi Batys Qazaqstan oblysyna tıesili.

Máslıhat depýtattary turaqty komıssııalardyń birlesken otyrysynda máseleni jan-jaqty talqylap, pılottyq negizde Bókeı ordasy, Qaratóbe jáne Tasqala aýdandarynyń ákimderin saılaýdy usyndy.

BQO aýmaqtyq saılaý komıssııasynyń habarlaýynsha, máslıhattyń sheshimimen osy úsh aýdan ákimderiniń saılaýy 5 qarasha kúni ótedi dep biraýyzdan bekitildi.