Batys Qazaqstan oblysynyń bıýdjeti 4,7 mlrd teńgege naqtylandy
Oblystyq máslıhattyń kezekten tys 13-sessııasynda BQO ekonomıka jáne bıýdjettik josparlaý basqarmasynyń basshysy Qaısar Mańqaraevtyń málim etkenindeı, sonyń ishinde 762 mln teńge áleýmettik salaǵa baǵyttalyp otyr. «Bilim týraly» QR Zańyna engizilgen ózgertýler men tolyqtyrýlar negizinde joǵary oqý oryndarynda 200 jasty jergilikti bıýdjet esebinen oqytý úshin bilim berý granttaryn belgileýge 45 mln teńge qaraldy. Aqjaıyq aýdanyndaǵy agrarlyq-tehnıkalyq kolledj ǵımaratyn kúrdeli jóndeýge 26 mln, Bókeı ordasy men Oral qalasynda eki bilim nysany qurylysyn jalǵastyrýǵa 153 mln, oblys ortalyǵynda 10 keshen men 10 oıyn alańyn salýǵa 353 mln, Zelenov aýdanynda dene shynyqtyrý-saýyqtyrý kesheni qurylysyn aıaqtaýǵa 94 mln, sondaı-aq Oralda 6 bilim nysanynyń jobalyq-smetalyq qujattamasyn jasaýǵa 9 mln teńge bólindi. 10 mln teńgege Qaztalov aýdany ortalyǵy Qaztalov aýylynda mýzyka mektebi ǵımaratynyń qurylysy bastalmaqshy.
Aýyl sharýashylyǵy men qorshaǵan ortany qorǵaý salasyna 200 mln teńge qarastyrylyp, sol qarjynyń bir bóligi epızootııalyq sharalardy júrgizýge, Jánibek aýdanynda sýarmaly jerdi qaıta qurýǵa jumsalmaqshy.
Kásipkerlikti qoldaýǵa 758 mln teńge baǵyttalsa, sonyń ishinde 558 mln teńge nátıjeli jumyspen qamtý jáne jappaı kásipkerlikti damytý baǵdarlamasy aıasynda qosymsha bıýdjettik nesıe berý úshin bólindi.
Kommýnaldyq sharýashylyq salasynyń úlesine 743,2 mln teńge tıip, sonyń ishinde Aqjaıyq, Jańaqala, Tasqala, Shyńǵyrlaý, Qaztalov aýdandarynda 6 sý qubyryn tartýǵa 281,4 mln teńge, Syrym aýdany Toǵanas aýylynda áleýmettik mekemelerdi gazdandyrýdy bastaýǵa 24 mln teńge berildi.
Qazirgi tańda Oral qalasynda jol qurylysy qarqyndy júrgizilip jatqany belgili. Bul joly qala kóshelerin jaryqtandyrý men jol-kópir sharýashylyǵyn kútip ustaýǵa 350 mln teńge, kóliktik ınfraqurylymdy damytýǵa 437,7 mln teńge, sonyń ishinde qalaishilik joldardy orta jáne kúrdeli jóndeýdi bitirýge 402 mln, oǵan qosa 15 avtokólik jolyna jobalyq-smetalyq qujattama jasaý jáne memlekettik saraptamadan ótkizý úshin 36 mln teńge qarastyryldy.
Aıta keteıik, sessııa barysynda soǵys jáne eńbek ardageri Muhtar Ájiǵulov, aqyn Aqushtap Baqtygereeva, alpınıst Maqsot Jumaev jáne oblystyń burynǵy ákimi Nurlan Noǵaev «Batys Qazaqstan oblysynyń qurmetti azamaty» ataǵyna usynylyp, ony depýtattar maquldady.